فخر امام نے کہا ہے کہ کشمیریوں جیسے بہادر لوگ شاید ہی دنیا میں پیدا ہوئے ہوں۔

یکجہتی کشمیر کانفرنس سے وفاقی وزیر فوڈ سیکیورٹی سید فخر امام نے خطاب کرتے ہوئے کہا ہے کہ قائد اعظم کی قیادت میں یہ فیصلہ کیا گیا تھا کہ پاکستان کو بطور ریاست قائم کرینگے۔

انہوں نے کہا کہ چھتیس سال قائد اعظم ممبئی سے آل انڈیا مسلم لیگ سے منتخب ہوتے رہے ، آج ہم کشمیر اور کشمیر کی آزادی کی بات کرتے ہیں۔

سید فخر امام نے کہا ہے کہ 75 لاکھ کے عوض 1876 میں کشمیر کو بیچا گیا ، کشمیریوں کی آزادی کی جنگ قریباً 93 سال پرانی ہے ، ڈوگرہ راج میں کشمیریوں کے اوپر بے پناہ مظالم ہوئے۔

وفاقی وزیر فوڈ سیکیورٹی نے کہا کہ حیدر آباد دکن، جونا گڑھ اور جموں کشمیر پر سیاست ہوئی ، پارٹیشن منصوبے کے تحت مسلم اکثریتی علاقے پاکستان کو دیے جائینگے ، ریڈ کلِپ ایوارڑ کے تحت گورداسپُور انڈیا کو دیا گیا جو جموں کشمیر کے ساتھ واحد راستہ تھا۔

انہوں نے کہا کہ آزاد کشمیر ہم نے زور بازو پر حاصل کیا، پونچھ کے جوانوں نے بہادری سے لڑا ، مہاراجہ کی بھارت کے ساتھ الحاق کی دستاویز آج تک سامنے نہیں آئی۔

سید فخر امام نے کہا ہے کہ کشمیر خواتین کو خراج تحسین پیش کرتے ہیں جو نہتی لڑتی ہیں، نریندر مودی کے نظریات آر ایس ایس سے شروع ہوتے ہیں ، مودی کشمیر کی خصوصی حیثیت ختم کرکے کشمیر کی ڈیموگرافی تبدیل کرنا چاہتا ہے۔

وفاقی وزیر فوڈ سیکیورٹی نے کہا کہ مودی کے نظریات کے باعث دنیا آج ہندوستان کو سیکیولر ریاست نہیں مانتی ، سیکیورٹی کونسل کی قرار دادیں کشمیر کو متنازعہ خطہ تسلیم کرتی ہیں۔

انہوں نے کہا کہ کشمیر کے معاملے پر پاکستان کی سیاسی جماعتوں میں کوئی اختلاف نہیں ، کشمیریوں جیسے بہادر لوگ شاید ہی دنیا میں پیدا ہوئے ہوں۔

سید فخر امام نے کہا ہے کہ عمران خان نے کہا وہ کشمیریوں کا سفیر ہے ، عمران خان کو 38 منٹ یو این اجلاس میں بولنے دیا گیا ، پاکستان ہمسایہ ممالک سے امن چاہتا ہے لیکن عزت و احترام کے ساتھ۔۔