عدالت نے منی لانڈرنگ کیس میں شہباز شریف اور حمزہ شہباز سمیت دیگر ملزمان کی عبوری ضمانت میں توسیع کرتے ہوئے 18 فروری کو تمام ملزمان کو فرد جرم کیلئے طلب کر لیا ہے۔ 

عدالت نے شہباز شریف سمیت دیگر کی عبوری ضمانت کی درخواستیں خارج کرنے کی استدعا بھی مسترد کر دی۔

اسپیشل کورٹ سنٹرل لاہور میں شہباز شریف، حمزہ شہباز سمیت دیگر ملزموں کیخلاف منی لانڈرنگ کیس کی سماعت ہوئی۔

اسپیشل جج سنٹرل لاہوراعجاز حسن اعوان نے کیس کی سماعت کی۔ شہباز شریف اور حمزہ شہباز عدالت میں پیش ہوئے۔

جج اسپیشل کورٹ سنٹرل نے استفسارکیا کہ شریک ملزمان کہاں ہیں؟ جس پر وکلا نے بتایا کہ پولیس شریک ملزمان کو اندرنہیں آنے دے رہی۔

جج نے ریمارکس دیے کہ پولیس نے میرا راستہ بھی روک دیا تھا۔

لیگی رہنما عطا تارڑ نے بتایا کہ پولیس نے صحافیوں کو اندر آنے سے روک کر ماحول خراب کیا۔ وکلا نے کہا کہ پولیس کہہ رہی ہے کہ عدالت نے صحافیوں کا داخلہ بند کیا ہے۔

جج اعجاز حسن اعوان نے ریمارکس دیے کہ میں نے صحافیوں کا داخلہ بند نہیں کیا۔

عدالت نے شریک ملزمان کو اندر آنے کا حکم دیتے ہوئے ایف آئی اے کو ہدایت کی ملزمان کو چالان کی کاپیاں فراہم کردیں۔

پراسیکیوٹر ایف آئی اے نے بتایا کہ یہ کاپیاں ابھی چیک کر لیں بعد میں نہ کہیں کہ کچھ مسنگ ہے۔

وکلا لیگی رہنما نے کہا کہ اتنے سارے والیمز ہیں فوراً کیسے چیک کرسکتے ہیں۔

اسپیشل جج سنٹرل کا پراسیکیوٹرسے مکالمہ

اسپیشل جج سنٹرل نےپراسیکیوٹرایف آئی اے سے مکالمہ میں کہا کہ آپ ایک بار تو کاپیاں فراہم کریں۔

قائدِ حزبِ اختلاف شہبازشریف نے عدالت سے استدعا کی کہ اسمبلی کا اجلاس ہے، سماعت 2 ہفتے تک کیلئے ملتوی کردیں۔

اسپیشل جج سنٹرل لاہورنے ریمارکس دیے کہ آپ حاضری معافی کی درخواست دے دیجیے گا۔

پراسیکیوٹر ایف آئی اے نے کہا کہ شہباز شریف سمیت تمام ملزموں کی ضمانت کی درخواستیں خارج کی جائیں۔

عدالت نے شہباز شریف سمیت تمام ملزموں کو چالان کی کاپیاں فراہم کر دیں۔

عدالت نے آئندہ سماعت پر ملزمان کو فردِ جرم کیلئے طلب کرتے ہوئے شہباز شریف اور حمزہ شہباز کی عبوری ضمانت میں بھی 18 فروری تک توسیع کر دی۔