پاکستان ڈیموکریٹک موومنٹ کے سربراہ مولانا فضل الرحمان نے کہا کہ سال میں ایک بجٹ ہوتا ہے یہاں 4 بجٹ ہیں۔

ڈیرہ اسماعیل خان میں جلسے سے خطاب کرتے ہوئے  فضل الرحمان نے کہا کہ ووٹ عوام کا حق ہے، 2018 کا الیکشن دھاندلی زدہ تھا، الیکشن کےنتائج پہلے تبدیل کیے گئے، آج بھی اسی موقف پر قائم ہوں۔

فضل الرحمان نے کہا ایف بی آر کا چیئر مین کہتا ہے کہ پاکستان دیوالیہ ہو گیا، ہمیں اپنا اسٹیٹ بینک بھی قرض دینے کو تیار نہیں۔

انہوں نے کہا کہ ہم نے اپنے مرکزی بینک کو آئی ایم ایف کے حوالے کر دیا ہے،اب اسٹیٹ بینک یہاں کسی کو جوابدہ نہیں، اب اسٹیٹ بینک حکومت کی قرض کی درخواست بھی مسترد کر سکتا ہے۔

پی ڈی ایم سربراہ نے کہا کہ جولائی 2019 سے اسٹیٹ بینک نے آج تک حکومت کو ایک روپے کا بھی قرض نہیں دیا، ملک میں مہنگائی عروج پر ہے، ابھی بھی ٹیکس لگانے کا کہا جا رہا ہے۔

ان کا کہنا تھا کہ حکومت کی کارکردگی 3سال گزرنے کےباوجود سب کے سامنے ہے، سال میں ایک بجٹ ہوتا ہے یہاں 4 بجٹ ہیں۔

مولانا فضل الرحمان نے کہا کہ میں نے ساری سیاسی جماعتوں کو اکٹھا کیا، ووٹ عوام کاحق ہے، عوام کو یہ حق لوٹا کے رہوں گا۔

انہوں نے کہا کہ ہم نے میڈیکل کالج،گرلز کالج، گومل زام ڈیم اور اسپتال بنائے، ہم نے اپنی حکومت میں سرکاری اسکولوں کے طلباء کو مفت کتابیں دیئے۔

پی ڈی ایم سربراہ نے کہا کہ آج غریب آدمی اپنے بچوں کیلئے راشن نہیں خرید سکتا، آج افغانستان، ایران اور بنگلا دیش معیشت میں ہم سے مضبوط ہے۔