عموماً وائرلیس چارجر اپنی ساخت کی بنا پر ایک ہی سمت میں موبائل آلات کو بجلی دے سکتے ہیں۔ لیکن اب ایک سیلنڈرنما وائرلیس الیکٹرومیگنیٹک چارجر بنایا گیا ہے جس کےگرد دائرے سے رکھے گئے کئی فون اور ٹیبلٹ ایک ہی وقت میں چارج کئے جاسکتے ہیں۔

اس طرح یہ چارجر ایک دائرے کی صورت میں 360 درجے پر یکساں وائرلیس شعاع پھینکتا ہے اور ایک ہی وقت میں کئی آلات اس کے پاس رکھ کریکساں طور پر بجلی بھری جاسکتی ہے۔ سیلنڈر چارجر کا سب سے اہم پہلو یہ ہے کہ بیلن کی شکل ہونے کے باوجود اس میں کوائل بہت ہی عمدہ طریقے سےبچھائی گئی ہیں جو باہم انتشار کی بجائے یکساں انداز میں وائرلیس امواج خارج کرتی ہیں۔

ان میں سے ہر ایک کوائل کو بجلی ایک الگ طریقے سے فراہم کی جاتی ہے یعنی پلگ سے آنے والی بجلی اندر پہنچ کر کئی درجوں میں تقسیم ہوکر ہرکوائل میں مساوی تقسیم ہوجاتی ہے۔ اس کی دوسری خوبی یہ ہے کہ جب جب چارجر کسی سمت میں رکھے فون یا برقی آلے کو محسوس کرتا ہے وہ اسی سمت میں وائرلیس قوت نشر کرنے لگتا ہے۔

فِن لینڈ کی آلٹو یونیورسٹی کے ماہرین نے یہ انوکھا چارجر بنایا ہے۔ اس پر اٹھنے والے اخراجات بہت زیادہ آرہے تھے جنہیں ایک نئی ٹیکنالوجی کی بدولت کم خرچ اور مؤثر بنایا گیا ہے۔ چارجر کے اندرر کوائل کو گول دائروں میں رکھا گیا ہے اور اوپر سے نیچے تک رابطوں کو ممکن بنانے کےلیے زیڈ کی شکل کا ایک الیکٹروڈ لگایا گیا ہے۔

کوائلوں میں بجلی پہنچنے سے جو مقناطیسیت پیدا ہوتی ہے وہ پیچیدہ اندز میں اوپر سے نیچے اور دائیں سے بائیں گھومتی رہتی ہے۔ اس دوران الیکٹرومیگنیٹک شعاعوں کی شدت اتنی کم رکھی گئی ہے کہ اول تو وہ کسی بھی طرح انسانوں کے لیے مضر نہیں اور نہ ہی دیگر گھریلو برقی نظام میں کوئی خلل ڈالتی ہے۔