عثمان بزدار نے کہا ہے کہ اپوزیشن کے خواب کبھی پورے نہیں ہوں گے۔

وزیراعلیٰ پنجاب سردار عثمان بزدار سے رکن پنجاب اسمبلی خرم خان لغاری کی ملاقات ہوئی جس میں خرم لغاری نے وزیراعظم عمران خان اور وزیراعلیٰ پنجاب سردار عثمان بزدارکی قیادت پر اعتماد کا اظہار کیا۔

عثمان بزدار نے کہا کہ وزیراعظم عمران خان کی قیادت میں پی ٹی آئی متحد ہے۔

انہوں نے یہ بھی کہا کہ پارٹی میں دراڑیں ڈالنے کی سازش کو مل کر ناکام بنائیں گے۔

عثمان بزدار نے کہا کہ اپوزیشن کے خواب کبھی پورے نہیں ہوں گے، موجودہ حالات میں نفاق کی سیاست کرنے والوں کے ہاتھ کچھ نہیں آئے گا۔

وزیراعلیٰ پنجاب سردار عثمان بزدار کا مزید کہنا تھا کہ اراکین اسمبلی میرے ساتھی ہیں، ہمیشہ عزت دی، منتخب نمائندوں کے جائز کاموں کو ترجیحی بنیادوں پر حل کیا ہے۔

دوسری جانب سردار عثمان بزدار سے صوبائی وزراء میاں خالد محمود، اسد کھوکھر اور خیال احمد کاسترو کی ملاقات ہوئی ہے جس میں صوبائی وزراء کا کہنا تھا کہ آپ کی قیادت پر پورا اعتماد ہے، آپ ہمارے وزیر اعلیٰ ہیں۔

عثمان بزدار کا کہنا تھا کہ ہم ایک تھے، ایک ہیں اور ایک رہیں گے، میرے دروازے آپ سب کیلئے کے لئے ہیں، کبھی کسی سے ناانصافی کی نہ کریں گے، انتقام کی سیاست ہمارا شیوہ نہیں۔

انہوں نے کہا کہ آپ کے جائز تحفظات کا ازالہ کیا جائے گا، ہماری پارٹی کا نام تحریک انصاف ہے اور ہم انصاف کی عملداری پر یقین رکھتے ہیں، اراکین اسمبلی کی عزت میری عزت ہے، سازشی عناصر پہلے بھی ناکام رہے اور آئندہ بھی ان کے عزائم کامیاب نہیں ہوں گے۔