سابق امریکی وزیر خارجہ ہیلری کلنٹن کرپٹو ایکسچینج کمپنیوں کی جانب سے روسی اکاؤنٹس بند کرنے سے انکار پر سیخ پا ہوگئی ہیں۔

 امریکی نشریاتی ادارے ایم ایس این بی سی سے گفتگو میں سابق وزیر خارجہ نے کرپٹو مارکیٹ میں روسی اثاثے منجمند نہ کرنے پرامریکی اور یورپی حکومتوں کو شدید تنقید کا نشانہ بنایا۔

ہیلری کلنٹن نے اس معاملے پر اپنے تحفظات کا اظہار کرتے ہوئے کہا کہ فوری اور ناقابل گرفت کرپٹو ٹرانزیکشن سے روس کو معاشی بحران سے نکلنے اور یوکرین پر بمباری جاری رکھنے کا جواز مل جائے گا۔

 ڈیموکریٹک سینیٹر نے امریکی اور یورپی یونین کی حدود میں شامل ممالک میں کرپٹو ایکسچینجزمیں روسی ایڈریسز پر کچھ وقت کے لیے پابندی لگانے میں ناکامی پر سخت برہمی کا اظہار کیا۔

میڈیا سے گفتگو میں انہوں نے امریکی صدر جو بائیڈن پر سخت تنقید کرتے ہوئے کہا کہ وہ اور یورپی حکومتیں روس کی کرپٹو کرنسی تک رسائی روکنے کے لیے سخت اقدامات نہیں کر رہیں۔

ہیلری کلنٹن کا مزید کہنا تھا کہ’ مجھے یہ دیکھ کر بہت مایوسی ہوئی کہ کچھ نام نہاد کرپٹو ایکسچینج روس کے ساتھ لین دین ختم کرنے سے انکار کر رہے ہیں، آزادخیالی کا یہ فلسفہ سمجھ سے بالا تر ہے۔‘

واضح رہے کہ آج ہی کرپٹو کرنسی میں لین دین کرنے والی دنیا کی دو بڑی ایکسچینج کمپنیوں ’کوائن بیس‘ اور ’بائنینس‘ نے روسی شہریوں کے کرپٹوکرنسی اکاؤنٹ منجمند کرنے سے انکار کردیا ہے۔

اس حوالے سے اس دونوں بین الاقوامی کرپٹو ایکسچینجز کا کہنا تھا کہ اس مشکل وقت میں عام روسی شہریوں کے اکاؤنٹس کی بندش سے ان کی مشکلات میں مزید اضافہ ہوگا۔