جسٹس اعجاز الاحسن نے کہا ہے کہ انصاف کی آسانی سے فراہمی کے بغیر انصاف نہیں ہو سکتا۔

لاہور کے نجی ہوٹل میں ’فرسٹ ٹیکنالوجی فار جسٹس کانفرنس‘ سے خطاب کرتے ہوئے سپریم کورٹ کے جسٹس اعجاز الاحسن نے کہا کہ میں آج کچھ تسلیم کرنا چاہتا ہوں میں فیس بک، انسٹاگرام اور ٹوئٹر پر نہیں ہوں۔ میں آج بھی ہاٹ میل استعمال کرتا ہوں۔

جسٹس اعجازالاحسن نے خطاب میں کہا کہ سٹیو جابز کہتا ہے ٹیکنالوجی کچھ نہیں ہوتی لوگوں پر یقین کریں۔ آپ لوگوں کو ٹولز دیں وہ حیران کن کام کریں گے۔

انھوں نے کہا کہ انصاف کی آسانی سے فراہمی کے بغیر انصاف نہیں ہو سکتا۔ صرف ٹیکنالوجی ہی نہیں، معمول سے ہٹ کر بھی سوچنے کی ضرورت ہے۔

جسٹس اعجاز الاحسن کا کہنا ہے کہ نا صرف ٹیکنالوجی بلکہ جج کو انصاف کی فراہمی کے لیے صلاحیت مند بھی ہونا چاہیے۔ سپریم کورٹ کورونا کے بدترین حالات کے دوران ایک دن کے لیے بھی بند نہیں ہوئی۔

انھوں نے کہا کہ ملک کی تمام عدالتوں نے کورونا کے دوران بھی اپنے دروازے کھلے رکھے۔ سپریم کورٹ نے آن لائن اور ویڈیو لنک کے ذریعے سماعت متعارف کرائی۔

جسٹس اعجاز الاحسن کا کہنا تھا کہ کووڈ کے دوران ٹیکنالوجی نے ہماری بہت مدد کی۔ ہم انفارمیشن ٹیکنالوجی کے ماہرین کے ساتھ اشتراک کر رہے ہیں۔ ہم نے بہت فاصلہ طے کر لیا، ابھی بھی بہت سا فیصلہ طے کرنا باقی ہے۔