شیخ رشید نے کہا ہے کہ مضبوط معیشت سے پاکستان ایک عظیم اسلامی ریاست کی طرف گامزن ہے۔

وزیرداخلہ شیخ رشید احمد نے 82 ویں یوم پاکستان پر خصوصی پیغام میں کہا کہ یوم پاکستان پر پوری قوم کو مبارکباد پیش کرتا ہوں۔

انہوں نے کہا کہ قیام پاکستان میں 23 مارچ 1940 کا دن ایک کلیدی حیثیت رکھتا ہے، 82 برس قبل پیش کی گئی قرارداد لاہور ہی پاکستان کے قیام کی بنیاد بنی، پاکستان کی بنیاد ایک عظیم فلسفے اورنصب العین پر رکھی گئی۔

شیخ رشید نے کہا کہ آزاد خارجہ پالیسی اورمضبوط معیشت سے پاکستان ایک عظیم اسلامی اور فلاحی ریاست کی طرف گامزن ہے، یوم پاکستان پرافواج پاکستان کے جذبے کو بھی خراج تحسین پیش کرتا ہوں۔

وزیر داخلہ نے کہا کہ یوم پاکستان پر پروقار پریڈ ہماری عظیم افواج کی ایک شاندار روایت ہے۔

واضح رہے کہ اسلام آباد کے شکر پڑیاں پریڈ گراؤنڈ میں یوم پاکستان کی مرکزی تقریب کا انعقاد کیا گیا۔

پریڈ میں صدرِ مملکت ڈاکٹر عارف علوی ، وزیرِ اعظم عمران خان اور پاک فوج کے سربراہ جنرل قمر جاوید باجوہ سمیت مسلح افواج کے سربراہان ، وزیر دفاع پرویز خٹک، وفاقی وزیر منصوبہ بندی اسد اور دیگر نے شرکت کی۔

رواں برس قیام یومِ پاکستان کی مرکزی پریڈ کی تھیم ’شاد رہے پاکستان‘ رکھی گئی تھی جو قومی ترانے سے ماخوذ ہے۔

پریڈ میں مسلح افواج کے آرمڈ کور، ائیر ڈیفنس اور دیگر دستے سامانِ حرب کے ساتھ حصہ لے رہے ہیں ، اس موقع پر خصوصی فلائی پاسٹ کا بھی مظاہرہ کیا گیا۔

صدرِ مملکت ڈاکٹر عارف علوی کی آمد پر خصوصی بگل بجایا گیا، قومی ترانہ پڑھنے اور تلاوت کلام پاک کے بعد پریڈ کا باقاعدہ آغاز ہوا۔

صدرِ مملکت ڈاکٹر عارف علوی نے خصوصی جیپ میں سوار ہو کر مسلح افواج کا معائنہ کیا۔

او آئی سی کے وزرائے خارجہ کو بھی یومِ پاکستان پریڈ میں خصوصی طور پر مدعو کیا گیا۔