امریکی ریاست جارجیا میں پھیلنے کے بعد ایک خاص قسم کی بڑی مکڑیوں نے اب اپنا رخ البامہ تک کرلیا ہے۔ لوگ اس سے خوفزدہ ہیں لیکن ماہرین نے زیادہ تشویش کا اظہارنہیں کیا ہے۔

یہ بڑی ایشیائی مکڑیاں ہیں جنہیں جورو اسپائیڈر کہا جاتا ہے اور انہوں نے شمال مشرقی امریکی ریاستوں کو اپنا مسکن بنارکھا ہے۔ محکمہ جنگلی حیات کے ماہرین کا اعتراف ہے کہ ان کی روک تھام کرنے سے کوئی خاص فائدہ نہیں ملے گا کیونکہ یہ اسی طرح پھیلتی ہیں۔

اگرچہ یہ بہت بڑی اور دیکھنے میں خوفناک ہیں لیکن ماہرین نے اسے انسانوں اور جانوروں کے لیے زیادہ خطرناک قرار نہیں دیا ہے۔ دوسری جانب یہ مقامی ایکوسسٹم کو بھی بہت زیادہ متاثر نہیں کرتیں۔ تاہم الابامہ کے لوگ اس سے ڈررہے ہیں کیونکہ وہاں اس کی بہتات دیکھی جاسکتی ہے۔

اگرچہ یہ مکڑی زہر بھی رکھتی ہے لیکن اس کا زہر انسانوں کے لیے بالکل خطرناک نہیں ۔ اس کے دانت چھوٹے ہیں اور کاٹ بھی لے تو انسانی کھال میں نہیں اترسکتے۔ جامعہ جارجیا میں حشرات کے ایک ماہر اینڈی ڈیوس کہتے ہیں کہ لوگوں کو چاہیے کہ اب وہ اس مخلوق کے ساتھ رہنے کی عادت بنالیں۔

شوخ پیلے رنگ کی یہ مکڑی ارتقائی طور پر قدرے مضبوط ہے جو بہت تیزی سے پھیلتی ہے۔ سب سے پہلے انہیں اٹلانٹا، ایتھنز اور دیگر علاقوں میں دیکھا گیا۔ بعد ازاں ٹینسی اور کیرولائنا یعنی جنوبی اور شمالی کیرولائنا میں بھی پھیل چکی ہے۔

خیال ہے کہ یہ مکڑی کسی بحری جہاز کے کنٹینر میں زندہ رہی اور اٹلانٹا پہنچی اور اس کے بعد اس نے اپنی نسل بڑھانا شروع کی۔ یہ بہت خوبصورت سہ ابعادی جالا بناتی ہے جو دس فٹ تک ہوسکتا ہے۔