اقتصادی رابطہ کمیٹی نے متعدد اشیاء پر سبسڈی کی منظوری دی ہے۔

وزیر خزانہ شوکت ترین کی زیر صدارت کابینہ کی اقتصادی رابطہ کمیٹی کا اجلاس ہوا جس میں ای سی سی نے متعدد اشیاء پر سبسڈی کی منظوری دی۔

اعلامیے کے مطابق اجلاس میں ای سی سی نے کسانوں کو خریف سیزن 2022ء کیلئے کھاد پر سبسڈی کی منظوری دیدی تاہم خریف سیزن کیلئے سبسڈی 24.26 ارب روپے موجودہ ففٹی ففٹی شئیرنگ بنیادوں پر دی جائے گی۔

ای سی سی نے سندھ اور بلوچستان کے کسانوں کو دی گئی سبسڈی کی تاریخ میں توسیع دیدی، حکومت سندھ کو سبسڈی کیلئے 3.89 ارب اور بلوچستان کو 54 کروڑ پہلے ہی دے چکے ہیں۔

اجلا س میں پاور ڈویژن کیلئے 50 ارب اور ایکسپورٹ ڈویلپمنٹ فنڈ کیلئے 4.5 ارب سپلیمنٹری گرانٹ کی منظوری دی گئی جبکہ سندھ اور بلوچستان کے لئے گندم  کی خریداری کا ہدف مقرر کرنے کی بھی منظوری دی گئی۔

اجلاس میں سندھ کیلئے 77 ارب کی کیش کریڈٹ لمٹ پر 1.40 ملین میٹرک ٹن کا ہدف مقررکیا گیا جبکہ بلوچستان کیلئے 6.20 ارب کی کیش کریڈٹ لمٹ پر 1 لاکھ میٹرک ٹن کا ہدف مقررکیا گیا۔

ای سی سی نے گندم کی کم از کم امدادی قیمت 1950 روپے من سے بڑھا کر 2200 روپے کردی۔

پنجاب کیلئے 220 ارب کی کیش کریڈٹ لمٹ پر 4 ملین میٹرک ٹن کا ہدف مقرر کیا گیا جبکہ کے پی کیلئے 72.50 ارب کی کیش کریڈٹ لمٹ پر 1.20 ملین میٹرک ٹن کا ہدف مقرر کیا گیا۔