لاہورہائیکورٹ نے سانحہ ماڈل ٹاؤن کی دوسری جے آئی ٹی کی تشکیل کے خلاف درخواست سماعت کے لیے مقرر کردی۔ 

چیف جسٹس لاہور ہائیکورٹ محمد امیر بھٹی کی سربراہی میں 7 رکنی لارجر بنچ 29 مارچ کو کیسس کی سماعت کرے گا۔

لاہور ہائی کورٹ کے لارجر بنچ میں جسٹس ملک شہزاد احمد خان، جسٹس مس عالیہ نیلم، جسٹس سید شہباز علی رضوی شامل ہیں۔

جسٹس سردار احمد نعیم، جسٹس سردار محمد سرفراز ڈوگر اور جسٹس طارق سلیم شیخ بھی ہائیکورٹ کے لارجر بنچ میں شامل ہیں۔

پولیس انسپکٹر رضوان قادر اور کانسٹیبل خرم رفیق نے دوسری جے آئی ٹی کی تشکیل کیخلاف ہائیکورٹ سے رجوع کیا جبکہ درخواست گزاروں کی جانب سے اعظم نذیر تارڑ اور برہان معظم ملک ایڈووکیٹ کیس کی پیروی کررہے ہیں۔

پنجاب حکومت کی جانب سے ایڈیشنل ایڈوکیٹ جنرل ملک اختر جاوید آئندہ سماعت میں پیش ہوں گے۔

سانحہ ماڈل ٹاون کیا ہے؟

17 جون 2014 کو لاہور کے علاقے ماڈل ٹاون میں تحریک منہاج القرآن کے مرکزی سیکریٹریٹ اور پاکستان عوامی تحریک (پی اے ٹی) کے سربراہ ڈاکٹر طاہر القادری کی رہائش گاہ کے سامنے قائم تجاوزات کو ختم کرنے کے لیے آپریشن کیا گیا تھا۔

آپریشن کے دوران پی اے ٹی کے کارکنوں نے مزاحمت کی، پولیس کے ساتھ جھڑپ کے نتیجے میں 14 افراد ہلاک ہو گئے تھے جبکہ 90 کے قریب زخمی بھی ہوئے تھے۔