آسٹریلوی کرکٹ ٹیم کے استقبال میں پاکستان کرکٹ بورڈ (پی سی بی) نے ایک انتہائی مزاحیہ اشتہار جاری کیا ہے، جو سوشل میڈیا پر خوب وائرل ہو رہا ہے۔

یہ اشتہار فیس بک پر اب تک ساڑھے 4 لاکھ سے زائد ویوز حاصل کر چکا ہے، جبکہ ناظریک کی جانب سے اسے 35 ہزار سے زائد لائکس دئیے جا چکے ہیں۔

پی سی بی کے مذکورہ اشتہار میں 24 سال بعد پاکستانی آنے والی آسٹریلوی ٹیم کے ساتھ پاکستان پہنچنے والے پاکستانی نژاد نوجوان کو دکھایا گیا ہے۔

نوجوان وطن واپس آکر ٹوٹی پھوٹی اردو بولنے کوشش کرتا ہے مگر پاکستانی شہری انگریزی میں بات کرکے اسے حیران کردیتے ہیں۔

واضح رہے کہ آسٹریلوی ٹیم 1998 کے بعد پاکستان کا دورہ کر رہی ہے، دونوں ٹیموں کے درمیان اب تک 2 ٹیسٹ کھیلے جاچکے ہیں جن کا کوئی نتیجہ برآمد نہیں ہوسکا۔

پاک آسٹریلیا ٹیسٹ سیریز کا تیسرا اور فیصلہ کن ٹیسٹ میچ 21 مارچ سے قذافی اسٹیڈیم لاہور میں شروع ہوگا۔

اسلام آباد کی کشیدہ سیاسی صورتِ حال کے پیش نظر پی سی بی نے راولپنڈی میں طے شدہ 3 ون ڈے اور ایک ٹی ٹوئنٹی میچ کو لاہور منتقل کردیا ہے۔

ون ڈے انٹرنیشنل میچز مقامی وقت کے مطابق سہ پہر 3 بجے جبکہ ٹی ٹونٹی انٹرنیشنل میچ مقامی وقت کے مطابق رات 8:30 بجے شروع ہوگا۔

مہمان ٹیم کے وائیٹ بال اسکواڈ میں شامل کھلاڑی 24 مارچ کو لاہور پہنچیں گے، جنہیں ایک روزہ  روم آئسولیشن کے بعد اسکواڈ جوائن کرنے کی اجازت ہوگی، قومی وائیٹ بال کھلاڑی 22 مارچ کو اکٹھے ہوں گے۔ انہیں 25 مارچ سے ٹریننگ کی اجازت ہوگی۔