پیر نور الحق قادری نے کہا ہے کہ عورت مارچ میں حقوق کے نام پر خواتین کی تذلیل ہو رہی تھی۔

وفاقی وزیر برائے مذہبی امور پیر نور الحق قادری سے حقوق نسواں تنظیم دخترانِ پاکستان  کے وفد نے ملاقات کی جس میں نور الحق قادری نے کہا کہ وزیر اعظم پاکستان کو لکھا گیا خط پاکستان کے متعدد معاشرتی حلقوں کی ترجمانی کرتا ہے۔

انہوں نے کہا کہ مغربی معاشرہ ہمارے خاندانی نظام  اور معاشرے کی طرح خواتین کو تحفظ اور عزت دینے سے قاصر ہے، عالمی یوم نسواں پرخواتین کو تعلیم  و روزگار کے مواقع، انسداد ہراسیت  اور وراثتی حقوق کو اجاگر کیا جائے۔

پیر نور الحق قادری نے کہا کہ حقوق نسواں کا پر جوش حامی ہوں تاہم عورت مارچ میں حقوق کے نام پر خواتین کی تذلیل ہو رہی تھی، بیوی کو خاوند اور بیٹیوں کو والدین کے خلاف بغاوت پر اکسایا جا رہا ہے۔

وفد دخترانِ پاکستان کا کہنا تھا کہ پاکستان میں مغربی ایجنڈا  کے تحت عالمی یوم نسواں کو کچھ سالوں سے عورت مارچ میں تبدیل کر دیا گیا ہے، ہمارا مذہب اور آئین پاکستان خواتین کو جائز حقوق  کی فراہمی کی مکمل ضمانت دیتا ہے۔

انہوں نے کہا کہ عورت مارچ میں لگنےوالے نعرے  پاکستان کے خاندانی نظام سے مطابقت نہیں رکھتے۔