معروف پاکستانی اداکار فیصل قریشی کی اہلیہ ثنا قریشی نے پی ٹی آئی سے مطالبہ کیا ہے کہ وہ بھارتی فلم 83 کے خلاف ایکشن لیں۔

رپورٹ کے مطابق بھارتی اداکار رنویر سنگھ کی نئی فلم 83 ریلیز ہو چکی ہے جس میں بھارتی لیجنڈ کرکٹر کپل دیو کی وجہ سے 1983 کرکٹ ورلڈکپ کی کامیابی اور اس میں ٹیم کی جدوجہد فلمائی گئی ہے۔

تاہم پاکستان کے شوبز ستارے اس فلم کے ایک سین پر غصے کا اظہار کرتے دکھائی دے رہے ہیں، اس حوالے سے پاکستان شوبز انڈسٹری کے معروف اداکار و میزبان فیصل قریشی کی اہلیہ ثناء فیصل نے پاکستان تحریکِ انصاف کی حکومت سے بھارتی فلم’83‘ کے خلاف ایکشن لینے کا مطالبہ کیا ہے۔

ثنا قریشی نے اپنی انسٹا اسٹوری پر سابق بھارتی کرکٹر کپل دیو کی زندگی پر بنی فلم’83‘ کا ایک ویڈیو کلپ شیئر کیا ہے۔

اس ویڈیو کلپ میں فلم کے ایک سین میں1983 کے ورلڈ کپ کے دوران بھارتی کرکٹ ٹیم کے کپتان کپل دیو کی پاکستانی کپتان عمران خان سے ملاقات دکھائی گئی ہے۔

تاہم ثناء فیصل نے فلم میں قومی ٹیم کے سابق کپتان اور موجودہ وزیرِ اعظم عمران خان کا کردار ادا کرنے والے اداکار چنکی پانڈے کے انتخاب پر اعتراض کیا ہے۔

اُنہوں نے اپنی انسٹا اسٹوری میں عمران خان، پاکستان تحریکِ انصاف اور نیٹ فلکس کو ٹیگ کرتے ہوئے لکھا کہ’یہ بہت غلط ہے!!‘

اُنہوں نے پاکستان تحریکِ انصاف سے مطالبہ کیا کہ’برائے کرم، اس بات پر ایکشن لیا جائے!!‘

ثناء فیصل نے اپنی اسٹوری پر مزید لکھا کہ’ یہ لوگ خان صاحب کے ساتھ یہ ظلم کیسے کرسکتے ہیں‘۔

انہوں نے اپنی بات پر زور دیتے ہوئے اپنی اگلی انسٹا اسٹوری پر ویڈیو کلپ کا اسکرین شاٹ لے کر فلم میں عمران خان کے کردار کو ادا کرنے والے اداکار کے چہرے کو ہائی لائٹ بھی کیا ہے۔

۔

انہوں نے کہا کہ اس کردار کے لیے غلط چہرے کا انتخاب کیا گیا ہے۔

انہوں نے فلم’83‘ کی کاسٹنگ ٹیم کے اس انتخاب پر انتہائی ناپسندیدگی اور غصے کا اظہار کرتے ہوئے لکھا کہ’ ہمیں یہ بات پسند نہیں آئی‘۔

یاد رہے کہ کبیر خان کی جانب سے بنائی گئی فلم 83 میں بھارتی مشہور اداکار رنویر سنگھ نے کپ دیو کا کردار نبھایا ہے جبکہ فلم کی کہانی 1983 کرکٹ ورلڈکپ کھیلنے والی بھارتی ٹیم سے متعلق ہے۔