برطانوی وزیر تجارت این میری ٹریولین کا کہنا ہے کہ یوکرین جنگ کے حوالے سے بھارتی مؤقف نے انہیں بہت مایوس کیا ہے۔ صرف برطانیہ ہی نہیں بھارت کے دیگر مغربی اتحادی ممالک اور امریکہ بھی اس حوالے سے بے چین نظر آتے ہیں۔

غیر ملکی خبر رساں ادارے کے مطابق برطانوی وزیرِ تجارت نے جمعرات کو کہا ہے کہ یوکرین پر روسی حملے پر بھارتی مؤقف نے انہیں بہت مایوس کیا ہے۔ بھارت نے دیگر مغربی ممالک کے برعکس ابھی تک روسی حملے کی مذمت نہیں کی اور اقوام متحدہ میں پیش کی جانے والی اس قرارداد کے حق میں بھی ووٹ نہیں ڈالا تھا، جس میں روسی حملے کی مذمت کی گئی تھی۔ اس سے نہ صرف مغربی ممالک بلکہ امریکہ میں بھی بے چینی پائی جاتی ہے۔

اس حوالے سے این میری ٹریولین کا مزید کہنا تھا کہ انہیں امید ہے کہ بھارت اپنا مؤقف تبدیل کر لے گا ہم بہت مایوس ہوئے ہیں۔ لیکن ہم اپنے بھارتی ساتھیوں کی رائے تبدیل کرنے کے لیے مل کر کام کر رہے ہیں۔

برطانیہ کی وزیر خارجہ لز ٹرس نے مشورہ دیا ہے کہ بھارت کے ساتھ اقتصادی اور دفاعی تعلقات گہرے بنانے سے اس کا ماسکو پر انحصار ختم کرنے میں مدد ملے گی۔

 دریں اثناء بھارتی وزارت خزانہ نے کہا ہے کہ ان کا ملک مغربی ممالک کی روس پر پابندیوں کا جائزہ لے رہا ہے اور روس کے ساتھ لین دین کے لیے ادائیگی کے طریقہ کار پر بھی غور کیا جا رہا ہے۔ بھارت اپنی تیل کی ضروریات کا ایک بڑا حصہ بین الاقوامی مارکیٹ سے خریدتا ہے اور اس حوالے سے وہ نئے امکانات جائزہ لیتا رہتا ہے۔

یاد رہے، برطانیہ نے بھارت کے ساتھ آزاد تجارتی معاہدے کے بارے میں بات چیت کا آغاز رواں برس جنوری میں کیا تھا اور ان مذاکرات کے دوسرے دور کا اختتام جمعے کے روز ہونا ہے۔ دونوں ملکوں کا کہنا ہے کہ وہ اس حوالے سے رواں برس ہی کسی حتمی نتیجے پر پہنچ جائیں گے۔