کراچی میں سمندری ہوائیں معطل ہونے کے باعث  آج شہر بھر میں گرمی کی شدت بڑھ گئی ہے۔

محکمہ موسمیات کے مطابق آج کراچی میں گرمی کی لہر کا یہ دوسرا دن ہے جس دوران پارہ 40 ڈگری سینٹی گریڈ سے تجاوز کرنے کا امکان ہے۔

آج کم سے کم درجہ حرارت 23.7 ڈگری سینٹی گریڈ ریکارڈ کیا گیا ہے  جبکہ گزشتہ روز درجہ حرارت 42.5 ڈگری سینٹی گریڈ ریکارڈ کیا گیا تھا۔

 اس حوالے سے محکمہ موسمیات کا کہنا ہے کہ محکمہ موسمیات کے مطابق آج (جمعرات ) گرمی اور بڑھ جائے گی جبکہ زیادہ سے زیادہ درجہ حرارت 43 سینٹی گریڈ رہنے کا امکان ہے۔

محکمہ موسمیات کے مطابق شہر میں سمندری ہوائیں معطل ہیں جبکہ اس وقت شہر میں 12 کلو میٹر فی گھنٹہ کی رفتار سے شمال مغربی ہوا چل رہی ہے۔

ہیٹ اسٹروک کا خدشہ:

کراچی میں گرمی کی شدت میں ہر روز اضافہ ریکارڈ کیا جارہا ہے جس کے باعث ہیٹ اسٹروک کے خدشات بڑھنے لگے ہیں۔

اس حوالے سے ماہرین صحت کا کہنا ہے کہ شہریوں کو گرمی سے بچاؤ کے لئے احتیاطی تدابیر اپناتے ہوئے زیادہ سے زیادہ پانی پیئے، دھوپ میں نکلنے سے گریز کریں  اور دھوپ میں نکلتے وقت گیلا تولیا سر پر رکھیں ۔

ماہرین کے مطابق گرم موسم میں ہیٹ اسٹروک کے خدشات بڑھ جاتے ہیں لٰہذا اس موسم میں اپنا خیال رکھیں۔

محکمہ موسمیات نے بتایا ہے کہ شہر میں لو کی کیفیت یکم اپریل تک جاری رہے گی۔

 محکمہ موسمیات نے واضح کیا ہے کہ اب تک ماہ مارچ میں سب سے زیادہ درجہ حرارت 20 مارچ 2010 کو 42.2 ڈگری ریکارڈ لیا گیا تھا۔