وزیراعلیٰ پنجاب سردار عثمان بزدار نے کہا ہے کہ 27 مارچ کا جلسہ پاکستان کی سیاسی تاریخ بدل دے گا۔

وزیراعلیٰ عثمان بزدار سے صوبائی وزراء محمد آصف نکئی اور محمد اختر ملک کی ملاقات ہوئی جس میں باہمی دلچسپی کے امور اور سیاسی صورتحال کے حوالے سے بات چیت کی گئی۔

عثمان بزدار نے ملاقات میں گفتگو کرتے ہوئے کہا کہ اپوزیشن انتشار کی سیاست کرکے ملک کو عدم استحکام سے دوچار کرنا چاہتی ہے۔

انہوں نے کہا کہ اپوزیشن کی جانب سے سیاسی انتشار پیدا کرنے کی ہر کوشش ناکام رہے گی، شکست اپوزیشن کا مقدر ہے، قوم کل بھی وزیراعظم عمران خان کے سا تھ تھی، آج بھی ہے اور کل بھی رہے گی۔

وزیراعلیٰ پنجاب نے مزید کہا کہ 27 مارچ کا جلسہ پاکستان کی سیاسی تاریخ بدل دے گا، اسلام آباد کا جلسہ پاکستان کی سیاست میں ایک نیا موڑ ثابت ہوگا۔

واضح رہے کہ چیف وہپ پنجاب اسمبلی ایم پی اے سید عباس علی شاہ بھی اس موقع پر موجود تھے۔

اسلام آباد جلسے کے لئے پی ٹی آئی کراچی کا پہلا قافلہ آج روانہ ہوگا

27 مارچ کو اسلام آباد میں ڈی چوک پر پاکستان تحریک انصاف کے جلسے کے لئے کراچی سے پہلا قافلہ آج روانہ ہوگا۔

یہ قافلہ اپوزیشن لیڈر سندھ اسمبلی حلیم عادل شیخ کی قیادت میں کاروان سندھ سہراب گوٹھ کراچی سے روانہ ہوگا جس کے لئے استقبالیہ کیمپ قائم کردیا گیا ہے۔

قافلے کی روانگی سے قبل حلیم عادل شیخ نے میڈیا سے گفتگو کرتے ہوئے کہا ہے کہ وزیراعظم کے اعلان پر پوری قوم اسلام آباد پینچ رہی ہے۔

 ان کا کہنا تھا کہ سیاست کے مکروہ کردار ایک ساتھ جمع ہورہے ہیں اور یہ سارے چور ایک ساتھ ایک بار پھر ملک کو لوٹنے والے اکھٹے ہوگئے ہیں۔

خیال رہے کہ وزیر اعظم عمران خان کے خلاف عدم اعتماد کی تحریک کو ناکام بنانے کے لئے تحریک انصاف کی جانب سے جلسے کی تیاریاں زور و شور سے جاری ہیں۔

وزیراعظم عمران خان کی جانب سے اعلان کیا گیا ہے کہ 27 مارچ کو پی ٹی آئی اسلام آباد ڈی چوک پر جلسہ کریگی۔

اس جلسے کے حوالے سے وزیراعظم نے دعویٰ کیا ہے کہ اس میں شرکاء کی تعداد 10 لاکھ ہوگی جس کو یقینی بنانے کے لئے تیاریاں جاری ہیں۔

اس ضمن میں پی ٹی آئی اراکین اسمبلی و کارکنان کی جانب  سے کراچی سے اسلام آباد روانگی کے لیے پوری ٹرین کی ایڈوانس بکنگ کرا ئی گئی ہے۔