مسجد الحرام میں غیر ویکسین شدہ افراد کو بھی عمرہ ونماز کی اجازت دے دی گئی ہے۔

سعودی وزارت حج وعمرہ کی جانب سے اعلان کیا گیا ہے کہ اب غیر ویکسین شدہ افراد بھی مسجد الحرام میں عمرہ اور نماز ادا کرسکیں گے تاہم اس کے لیے ایک شرط عائد کی گئی ہے۔

سعودی وزارت حج وعمرہ کے مطابق مسجد الحرام میں صرف ان غیر ویکسین شدہ افراد کو عمرہ اور نماز ادا کرنے کی اجازت ہوگی جو اب تک عالمی وبا کورونا وائرس کا شکار ہی نہیں ہوئے تاہم پہلے سے کورونا وائرس کا شکار افراد کے لیے ویکسین کی شرط اب بھی موجود ہے۔

سعودی وزارت کی جانب سے کہا گیا کہ غیر ویکسین شدہ افراد کو صرف اس شرط پر اجازت نامہ جاری کیا جائے گا کہ انہوں نے کورونا کے شکار کسی مریض سے میل جول نہ کیا ہو۔

وزارت حج و عمرہ نے اپنے بیان میں مزید کہا کہ مملکت میں کورونا وائرس کی صورتحال مستحکم ہے جس کی وجہ سے اب کورونا ویکسین نہ لگوانے والے افراد کو عمرہ کرنے اور مسجد الحرام میں نماز پڑھنے کی اجازت دی گئی ہے۔

یہ بھی پڑھیں: مسجد حرام اور مسجد نبوی میں داخلے پر عائد پابندیوں میں مزید نرمی

اس سے قبل سعودی وزارت حج وعمرہ کی جانب سے مسجد الحرام  میں داخلے پر عائد پابندیوں میں مزید نرمی کی گئی تھی تاہم اس وقت تک تمام افراد کے لیے کورونا وائرس کی ویکسین لگانا لازم قرار دیا گیا تھا۔

دوسری جانب مسجد الحرام اور مسجد نبوی ﷺ کے امور کی جنرل پریذیڈنسی میں زبانوں اور ترجمے سے متعلق انتظامیہ نے ایک خصوصی شناختی کارڈ متعارف کرایا ہے۔

اس کارڈ کا مقصد کئی برقی خدمات تک رسائی کو آسان بنانا ہے۔ ان خدمات کا تعلق منارۃ الحرمین کے پلیٹ فارم کے ذریعے براہ راست خطبوں اور اسباق کے ترجمے ، ریڈیو پروگراموں اور صوتی کتب کے نشر کیے جانے سے ہے۔