یورپی یونین کے تین بڑے اداروں نے کرپٹو اثاثوں میں سرمایہ کاری کرنے والے افراد کی رقم ڈوبنے کی وارننگ جاری کردی ہے۔

ٹیکنالوجی ویب سائٹ گیجٹس 360 کے مطابق یورپی یونین کے ریگولیٹرز نے کرپٹو کرنسی میں ٹریڈنگ کرنے والے افراد کو خبردار کیا ہے کہ وہ ڈیجیٹل اثاثوں میں کی گئی تمام سرمایہ کاری کے ڈوبنے کے لیے تیاررہیں۔

یورپی یونین کے سیکیورٹیرز، بینکنگ اورانشورینس واچ ڈاگ کی جانب سے جاری مشترکہ اعلامیے میں کہا گیا ہے کہ صارفین کی جانب سے بٹ کوائن اور ایتھریم سمیت 17 ہزارسے زائد مختلف کرپٹو اثاثوں کی خریداری کی جارہی ہے اور خدشہ ہے کہ وہ اس تمام رقم سے ہاتھ دھو بیٹھیں گے۔

یورپی یونین کے اعلامیے میں بتایا گیا ہے کہ کرپٹو اثاثوں اور اس میں سرمایہ کاری کرنے والے صارفین کویونین کے مالیاتی خدمات کے قوانین کے تحت کوئی تحفظ حاصل نہیں ہے۔

ریگولیٹرزکے مطابق یورپی یونین کی حدود میں شہری اپنی سرمایہ کاری ڈوبنے کے خطرے سے بے نیاز ہو کر 17 ہزار سے زائد کرپٹو اثاثوں کی خرید و فروخت کررہے ہیں جن میں سے 60 فیصد حصہ بٹ کوائن اور ایتھریم کا ہے۔

مشترکہ اعلامیے میں مزید کہا گیا ہےکہ صارفین کو سوشل میڈیا اور انفلوئنسرز کی جانب سے گمراہ کن اشتہارات اور زیادہ منافع کا لالچ دینے والی سرمایہ کاری سے بچنا چاہیے۔

جب کہ صارفین کو کرپٹو کرنسی میں سرمایہ کاری سے قبل اس بات کو بھی مدنظررکھنا چاہیے کہ کرپٹو کی مائننگ سے ماحولیاتی نظام پر بھی برے اثرات مرتب ہورہے ہیں۔