بنگلہ دیش کرکٹ بورڈ نے بالآخر شکیب الحسن کو 8 اپریل تک آرام کی غرض سے چھٹی دے دی۔

آئی پی ایل کھیلنے کو بے تاب شکیب الحسن نے لیگ کے میگا آکشن سے قبل ہی بنگلہ دیش کرکٹ بورڈ کو قومی ڈیوٹی سے چھٹی کی درخواست دے دی تھی۔

شکیب الحسن نے اس امید پر چھٹی کی درخواست دی تھی کہ وہ آئی پی ایل میں شرکت کریں گے، مگر انڈین لیگ کی کسی فرنچائز نے انہیں منتخب نہیں کیا۔

جس کے بعد پہلے تو شکیب نے جنوبی افریقہ کے خلاف سیریز میں دستیابی کا عندیہ دیا، بورڈ نے بھی ان کو جنوبی افریقہ سیریز کے لئے ممکنہ کھلاڑیوں کی فہرست میں شامل کیا۔

مگر پھر اچانک شکیب الحسن نے یو ٹرن لیتے ہوئے بورڈ کو 8 اپریل تک کے لئے دوبارہ چھٹی کی درخواست کر دی، اس درخواست میں شکیب الحسن نے ذہنی دباؤ اور تھکن کے باعث 8 اپریل تک عالمی کرکٹ سے دور رہنے کی خواہش ظاہر کی ۔

بنگلہ دیش کرکٹ بورڈ کے سربراہ نظم الحسن نے شکیب الحسن کے بار بار ’یوٹرن‘ لینے پر سخت ناراضی کا اظہار کیا ہے۔

نظم الحسن نے کہا کہ اگر شکیب آئی پی ایل کے میگا آکشن میں منتخب ہو جاتے تو کیا وہ اپنی فرنچائز کو چھٹی لینے کی درخواست دے سکتے تھے۔

بورڈ نے تجربہ کار آل راؤنڈر کی درخواست منظور کر لی ہے اور شکیب الحسن کا نام رواں ماہ جنوبی افریقہ کے خلاف سیریز کے ممکنہ کھلاڑیوں کی فہرست سے نکال دیا ہے۔