روس یوکرین میں کرپٹو کرنسی ایک طاقت ور فریق کے طور پر سامنے آئی ہے۔ دنیا بھر کے کرپٹو کرنسی ایکسچینجز یوکرین پر حملے کے خلاف روسی سے تعلق رکھنے والے کرپٹو ایڈریسسز کو بلاک کر رہے ہیں۔

دوسری جانب یوکرین پرعطیات کی شکل میں بٹ کوائن، ایتھریم، ڈوج کوائن اور دیگر کرپٹو کرنسیوں کی بارش ہورہی ہے۔

گزشتہ روز دنیا کے بڑے کرپٹو ایکسچینج کوائن بیس نے روس کے 25 ہزار سے زائد کرپٹو ایڈریس بلاک کیے تو ایک اور بڑے ایکسینچ نے ڈھائی ملین ڈالر مالیت کی کرپٹو کرنسی عطیہ کردی ہے۔

اقوام متحدہ کی جانب سے ہنگامی بنیادوں پر جنگ سے متاثرہ یوکرین میں امدادی کارروائیوں کے لیے عطیات دینے کی درخواست کی گئی تھی۔

یہ  بھی پڑھیں: کرپٹو کرنسی مغربی طاقتوں کے سامنے ڈھیر، روسی اکاؤنٹس منجمد

جس کے بعد کرپٹو ایکسچینج بائنینس نے اقوام متحدہ کے ذیلی ادارے یونیسیف کو جنگ سے متاثرہ یوکرینی بچوں کی مددد کے کے لیے 25 لاکھ ڈالر مالیت کی کرپٹو کرنسی عطیہ کردی ہے۔

بائنینس کی جانب سے یوکرین کے لیے دیا جانے والا یہ دوسرا عطیہ ہے۔ اس سے قبل کمپنی نے جنگ زدہ ملک کے لیے ایک کروڑ ڈالر مالیت کی کرپٹو کرنسی عطیہ کی تھی۔

یونیسیف کی جانب سے اعلامیے میں کہا گیا ہے کہ ’اس کڑے وقت میں یونیسیف کی جانب سے عطیات دیے گئے ہیں جس جسے یوکرین اور اس کے پڑوسی ممالک میں رہنے والے بچوں کی فلاحی سرگرمیوں پر خرچ کیا جائے گا۔‘

یاد رہے کہ گزشتہ روز کوائن بیس کے ساتھ ساتھ کالا دھن چھپانے کی جنت سوئٹزر لینڈ اور جنوبی کوریا نے روسی شہریوں اور کاروباری شخصیات کے کرپٹو کرنسی اور دیگر ڈیجٹل ایڈریسسز تک رسائی بند کردی ہے۔

امریکی نشریاتی ادارے سی این بی سی کی ایک رپورٹ کے مطابق 24 فروری کے بعد یوکرین کو کرپٹو کرنسی کی شکل میں تقریبا 60 ملین  ڈالر کے عطیات مل چکے ہیں۔