وزیراعظم آزاد جموں وکشمیرنے کہا ہے کہ عمران خان پاکستان کو ریاست مدینہ بنانے کے راستے پر گامزن ہے۔

وزیراعظم آزاد جموں وکشمیر سردار عبد القیوم نیازی نے اپنے ایک بیان میں کہا کہ پاکستان کو عالمی چیلنجز درپیش ہیں، پاکستان کو دھمکیاں مل رہی ہیں جبکہ اپوزیشن جماعتیں پاکستان کو عدم استحکام کا شکار کرنے کی سازش کر رہی ہے۔

انہوں نے کہا کہ عمران خان پاکستان کو ریاست مدینہ بنانے کے راستے پر گامزن ہے جبکہ وزیراعظم عمران خان کو کوئی خطرہ نہیں وہ اپنی مدت پوری کریں گے۔

وزیراعظم آزاد جموں وکشمیر کا کہنا تھا کہ وزیراعظم عمران خان کے اعتماد پر پورا اتروں گا۔ میرا کوئی ایجنڈا نہیں،عمران خان کا ایجنڈا میرا ایجنڈا ہے۔

عبد القیوم نیازی نے کہا کہ غریب کو اپنے قدموں پراٹھانا ،ملکی مفادات پر سودے بازی نہ کرنا،کرپٹ مافیا کا احتساب اور تحریک آزادی کو اجاگر کرنا ترجیحات ہیں۔

ان کا کہنا تھا کہ اپوزیشن اپنی کرپشن چھپانے اور کڑے احتساب سے بچنے کے لئے لئے سیاسی ڈرامہ بازیاں کررہی ہے مگر یہ احتساب سے بچ نہیں سکیں گے۔

عبد القیوم نیازی نے کہا کہ عمران خان کی صورت میں قائداعظم اور بھٹو کے بعد پاکستان کو تیسرا بڑا لیڈر ملا ہے جو ملک کو اندرونی اور بیرونی سازشوں سے بچا رہا ہے۔

وزیراعظم آزاد جموں وکشمیر سردار عبد القیوم نیازی کا مزید کہنا تھا کہ عمران خان سسٹم کو ٹھیک کررہا ہے وہ ریاست مدینہ قائم کر کے رہے گا۔ اپوزیشن کی ہر کوشش ناکام ہو گی ، عمران خان 2023 میں پھر اقتدار میں آئیں گے۔