وفاقی دارالحکومت میں سیاسی گرما گرمی کے باعث اسپتالوں کے عملے کو الرٹ رہنے کی ہدایات جاری کردی گئیں ہیں۔

جاری کردہ ہدایات کے مطابق ضلعی انتظامیہ نے اسلام آباد کے تمام سرکاری اسپتالوں کو الرٹ رہنے کا کہا گیا ہے۔

ہدایات کے بعد ڈاکٹرز اور پیرا میڈیکل اسٹاف کی تمام چھٹیاں منسوخ کر دی گئیں ہیں  اور ساتھ ہی احکامات دیئے گئے ہیں کہ اسپتالوں میں کسی بھی صورتحال سے نمٹنے کے لئے تمام انتظامات مکمل رکھے جائیں۔

ضلعی انتظامیہ کے مطابق پمز اسپتال پولی کلینک اور سی ڈی اے اسپتال 3 اپریل تک الرٹ رہیں گے۔

خیال رہے کہ اسلام آباد میں 27 مارچ کو حکومت سمیت مسلم لیگ ن اور جے یو آئی کے جلسے ہونے والے ہیں جبکہ کئی مقامات پر حکومت اور اپوزیشن کے قافلے ایک دوسرے سے ٹکرائیں گے جہاں کسی قسم کی بھی صورتحال پیدا ہونے کے خدشات ہیں۔

اس دوران ہوسکتا ہے کہ کوئی ناگوار صورتحال پیش آجائے جس سے نمٹنے کے لئے ضلعی انتظامیہ نے تمام حفاظتی اقدامات مکمل کرلیئے ہیں۔

واضح رہے کہ پاکستان تحریک انصاف عدم اعتماد کو ناکام بنانے کے لئے ڈی چوک پر شاندار جلسہ کرنے کا اعلان کرچکی ہے جس کا موضوع ’امربالمعروف‘ ہے، اس جلسے میں شرکت کے لئے ملک بھر سے قافلے روانہ ہوچکے ہیں جبکہ کچھ قافلے اسلام آباد پہنچ چکے ہیں۔

علاوہ ازیں ترین گروپ کے ارکان نے حکومت کے ڈی چوک پر جلسے میں شرکت نہ کرنے کا اعلان کیا ہے اور اس فیصلے سے جہانگیر ترین کو بھی آگاہ کردیا گیا ہے۔

دوسری جانب پاکستان مسلم لیگ ن کا مہنگائی مکاؤ مارچ مریم نواز اور حمزہ شہباز کی قیادت میں آج لاہور سے روانہ ہوا ہے جبکہ جے یو آئی کا قافلہ آج ڈی آئی خان سے مولانا فضل الرحمان کی قیادت میں اسلام آباد کے لئے روانہ ہوا ہے۔

یاد رہے کہ عدم اعتماد کے معاملے پر پاکستان مسلم لیگ ق اور ایم کیو ایم پاکستان کی جانب سے کل ہونے والے جلسے کے بعد اپنے حتمی فیصلے کا اعلان کیے جانے کا امکان ہے۔