ٹیکسلا میں اینٹی نارکوٹکس فورس (اے این ایف) کی جانب سے کی گئی کارروائی کے نتیجے میں بھاری مقدار میں منشیات برآمد کرلی گئی ہے۔

تفصیلات کے مطابق کارروائی ٹیکسلا میں اے این ایف انٹیلیجنس اور اے این ایف راولپنڈی کی جانب سے براہمہ موٹروے انٹرچینج پر کی گئی۔

کارروائی کے نتیجے میں  36کلوگرام منشیات برآمد کرلی گئی ہے، برآمدشدہ منشیات میں 24 کلو گرام چرس، 9.6 کلو گرام افیون اور 2.4 کلو گرام ہیروئن شامل ہے۔

اے این ایف حکام کا کہنا ہے کہ مقبوضہ منشیات ٹرک میں موجود خفیہ خانوں میں مہارت سے چھپائی گئی تھی ، دورانِ کارروائی ٹرک کے ڈرائیور جہانزیب نامی ملزم کو گرفتار کر لیا گیا ہے۔

 اے این ایف حکام نے مزید بتایا کہ ملزم کے خلاف انسداد منشیات ایکٹ کے تحت مقدمہ درج کر لیا گیا ہے اور مزید تفتیش جاری ہے۔

واضح رہے کہ کچھ دن قبل بھی اینٹی نارکوٹکس فورس (اے این ایف) اور اے این ایف کراچی نے شہر قائد میں مشترکہ کارروائی کرتے ہوئے بھاری مقدار میں منشیات برآمد کی تھی۔

 کارروائی الآصف اسکوئر کے قریب کی گئی تھی جہاں تین ملزمان کے قبضے سے 3.030 کلوگرام منشیات برآمد کی گئی تھی۔

ترجمان اے این ایف کے مطابق ملزمان کو منشیات کی خرید و فروخت کے دوران رنگے ہاتھوں گرفتار کیا گیا، گرفتار ملزمان میں چاغی کے رہائشی راشد اور فضل الرحمن جبکہ سانگھڑ کا رہائشی محمد رفیق شامل ہیں۔