بھارتی کرکٹ ٹیم کے سابق کپتان ویرات کوہلی جمعہ کو موہالی میں اپنے کیرئیر کے 100 ویں ٹیسٹ کے لئے میدان میں اتریں گے۔

بھارت اور سری لنکا کے درمیان سیریز میں کورونا پابندیوں کے پیش نظر شائقین کو میدان میں آنے کی اجازت نہیں تھی.

لیکن بھارتی بلے باز ویرات کوہلی کے 100 ٹیسٹ کے پیش نظر بی سی سی آئی نے 50 فیصد تماشائیوں کو گراؤنڈ میں آنے کی اجازت دے دی ہے۔

بھارتی میڈیا کے مطابق بھارتی کرکٹ بورڈ نے یہ فیصلہ خصوصی طور پر ویرات کوہلی کے 100 ویں ٹیسٹ کو مد نظر رکھ کر کیا گیا ہے، اس حوالے سے گراؤنڈ میں ایک تقریب بھی منعقد کئے جانے کا امکان ہے۔

 بھارتی پنجاب کرکٹ ایسوسی ایشن  نے 50 فی صد تماشائیوں کے میدان میں آنے کی تصدیق کردی ہے۔ اب شائقین کوہلی کے 100ویں ٹیسٹ کے گواہ بن سکیں گے۔

اس سے قبل کوہلی کو سری لنکا کے خلاف ٹی ٹوئنٹی سیریز سے آرام دیا گیا تھا۔ ہندوستان نے ٹی ٹوئنٹی سیریز میں 3-0 سے کلین سوئپ کیا تھا ۔

بھارتی پنجاب کرکٹ ایسوسی ایشن کے خزانچی آر پی سنگلا نے کہا کہ ہمیں بی سی سی آئی سے پہلے میچ کیلئے 50 فیصد شائقین کو اجازت دینے کے حوالے سے معلومات ملی ہیں۔ ہم بدھ سے آن لائن ٹکٹوں کی فروخت شروع کریں گے۔

آر پی سنگلا نے کہا کہ ٹکٹ کاونٹر پر رش ہونے کی وجہ سے ہم ٹکٹوں کی آن لائن فروخت کریں گے۔ اب شائقین 100ویں ٹیسٹ میں کوہلی کو سامنے سے کھیلتے ہوئے دیکھ سکیں گے۔

بھارتی ٹیم کے سابق کپتان ویرات کوہلی کا ٹیسٹ میں شاندار ریکارڈ ہے۔ انہوں نے 99 ٹیسٹ کی 168 اننگز میں 50 کی اوسط سے 7962 رنز بنائے ہیں۔

 ویرات کوہلی نے اپنے ٹیسٹ کیرئیرمیں 27 سنچریاں اور 28 نصف سنچریاں اسکور کی ہیں۔

واضح رہے کہ ویرات کوہلی نومبر 2019 سے بین الاقوامی کرکٹ میں سنچری بنانے میں کامیاب نہیں ہو سکے ہیں ۔ ایسے میں وہ 100ویں ٹیسٹ میں سنچری بنا کر اس میچ کو یادگار بنانا چاہیں گے۔