بھارتی پنجاب کے شہر امرتسر میں واقع بارڈر سیکورٹی فورسز ( بی ایس ایف)  ہیڈ کوارٹر میں ایک اہلکار نے طیش میں آکر تابڑ توڑ فائرنگ کردی، جس کے نتیجے میں چار اہلکاروں کے ہلاک ہونے کی اطلاع ہے، جبکہ 10 سے 12 زخمی ہیں۔

اس واقعہ کے بعد فائرنگ کرنے والے اہلکار نے خود کو بھی گولی مار کر خود کشی کرنے کی کوشش کی۔

اہلکار کو سنگین حالت میں اسپتال لے جایا گیا ہے، جہاں اس نے دم توڑ دیا۔

گولی چلانے والے ملزم کی شناخت مہاراشٹرا کے ستپّا کے طور پر ہوئی ہے۔

بھارتی ذرائع ابلاغ کے مطابق زیادہ وقت تک ڈیوٹی کرنے کی وجہ سے اہلکار ذہنی تناو کا شکار ہوچکا تھا۔

ایک رپورٹ کے مطابق ڈیوٹی کے وقت کے حوالے سے مذکورہ اہلکار کی اپنے افسران سے بحث بھی ہوئی تھی، اس کے بعد اس نے اتوار کو غصہ میں کمپلیکس میں تابڑ توڑ گولیاں چلانی شروع کردیں، جس کی وجہ سے وہاں افراتفری کا ماحول پیدا ہوگیا اور دیگر اہلکار جان بچانے کے لیے ادھر ادھر بھاگنے لگے۔

واقعے میں چار اہلکاروں کی موت ہوئی ہے اور تقریباً ایک درجن زخمی ہیں۔ دو اہلکاروں کی جائے وقوعہ پر ہی موت ہوگئی تھی۔ حالانکہ چار اہلکاروں کی ہلاکت کی ابھی تک سرکاری طور پر تصدیق نہیں ہوئی ہے۔

لاشوں کو مردہ خانے میں رکھا گیا ہے، جبکہ زخمی اہلکار اسپتال میں زیرِ علاج ہیں۔

بی ایس ایف کے سینئر افسران جائے وقوعہ پر موجود ہیں اور پورے واقعہ کا جائزہ لے رہے ہیں۔