جوڈیشل کمیشن نے لاہور ہائیکورٹ کے تیرہ ایڈیشنل ججوں کی کارکردگی رپورٹ طلب کر لی۔

ذرائع کے مطابق 13 ایڈیشنل ججوں کی کارکردگی رپورٹ جوڈیشل کمیشن کے اجلاس سے قبل طلب کی گئی ہے۔ جوڈیشل کمیشن کا اجلاس آئندہ ماہ چیف جسٹس پاکستان جسٹس عمرعطا بندیال کی سربراہی میں ہوگا۔

ذرائع کا کہنا ہے کہ سپریم کورٹ کے سینئر ترین جج جسٹس قاضی فائز عیسی، جسٹس طارق مسعود سمیت دیگر ممبران اجلاس میں شرکت کرینگے۔ جوڈیشل کمیشن کے اجلاس میں ہائیکورٹ کے 13 ایڈیشنل ججوں کو مستقل کرنے یا نہ کرنے پر غور ہوگا۔

ذرائع نے کہا ہے کہ اجلاس میں ہائیکورٹ کے ایڈیشنل ججوں کے عہدے کی میعاد میں 1 سال کی توسیع کرنے پر بھی غور کیا جا سکتا ہے۔ ہائیکورٹ کے ایڈیشنل ججوں کے زیرالتواء کیسز کی تفصیلات مانگی گئی ہیں۔

ذرائع کے مطابق ایڈیشنل ججوں کے عدالتی نظیر قرار دیے گئے فیصلوں کی تفصیلات بھی طلب کی گئی ہیں۔ ہائیکورٹ کو 13 ایڈیشنل ججوں کے نمٹائے گئے کیسز کی تفصیلات بھی مانگی گئی ہیں۔

7 مئی 2021ء کو لاہور ہائیکورٹ میں 13 ایڈیشنل ججوں کا تقرر کیا گیا تھا جس میں جسٹس سہیل ناصر، جسٹس شکیل احمد، جسٹس صفدر سلیم شاہد، جسٹس احمد ندیم ارشد، جسٹس طارق ندیم، جسٹس محمد امجد رفیق ایڈیشنل ججوں میں شامل ہیں۔

جسٹس عابد حسین چٹھہ، جسٹس انوار حسین، جسٹس علی ضیاء باجوہ، جسٹس سلطان تنویر، جسٹس محمد رضا قریشی، جسٹس محمد شان گل اور جسٹس راحیل کامران بھی لاہور ہائیکورٹ کے 13 ایڈیشنل ججوں میں شامل ہیں۔