یوسف رضا گیلانی نے کہا ہے کہ تحریک عدم اعتماد سے متعلق سب ایک پیج پر ہیں۔

سابق وزیراعظم یوسف رضا گیلانی نے اجلاس کے بعد میڈیا سے گفتگو کرتے ہوئے کہا کہ پیپلز پارٹی نے عوامی مارچ میں اپوزیشن جماعتوں کو شرکت کی دعوت دیدی۔

 انہوں نے کہا کہ تحریک عدم اعتماد سے متعلق نمبر گیم پوری ہے، تحریک عدم اعتماد سے متعلق کوئی ڈیڈ لاک نہیں سب ایک پیج پر ہیں۔

یوسف رضا گیلانی کا کہنا ہے کہ تحریک سے متعلق تین بڑوں نے علیحدہ بیٹھ کر بات کی ہے۔

سابق وزیراعظم یوسف رضا گیلانی کا مزید کہنا ہے کہ تحریک لانے سے قبل اسپیکر کے کردار کو دیکھنا ہے، قانونی ماہرین کو اسپیکر کے کردار کے جائزے کا کام سونپ دیا ہے۔

وزیر اعظم کیخلاف عدم اعتماد پر 3 بڑوں کی بیٹھک، تحریک پر قانونی نکات کا جائزہ لیا

واضح رہے اس سے قبل وزیر اعظم کے خلاف تحریک عدم اعتماد پر 3 بڑوں کی زرداری ہاؤس میں بیٹھک ہوئی جس میں عمران خان کے خلاف تحریک عدم اعتماد کے حوالے سے مخلتف قانونی و آئینی آپشنز پر غور کیا گیا۔

تینوں جماعتوں کے قانونی ماہرین نے اپوزیشن قائدین کو بریفنگ دی، وزیر اعظم کے خلاف تحریک عدم اعتماد پیش کرنے سے متعلق قانونی نکات کا جائزہ لیا گیا۔

تحریک عدم اعتماد کی کامیابی کے لئے حمایت کرنیوالے حکومتی ارکان کا جائزہ لیا گیا۔

پیپلزپارٹی کی طرف سے یوسف رضا گیلانی، خورشید شاہ، مراد علی شاہ ملاقات میں موجود تھے جبکہ مسلم لیگ (ن) کی جانب سے ایاز صادق، سعد رفیق ملاقات میں موجود تھے۔