اسلام آباد کی مقامی عدالت نے لڑکا لڑکی ویڈیو اسکینڈل کیس میں مرکزی ملزم عثمان مرزا سمیت پانچ ملزمان کو جرم ثابت ہونے پرعمرقید کی سزا سنا دی۔ 

تفصیلات کے مطابق اسلام آباد کی مقامی عدالت کے ایڈیشنل سیشن جج عطا ربانی نے کیس کا فیصلہ سنایا۔

عدالت نے کیس کے مرکزی ملزم عثمان مرزا، محب بنگش، ادارس قیوم بٹ،حافظ عطا الرحمن اور فرحان شاہین کو عمر قید کی سزا سنائی جبکہ دو ملزمان عمر بلال مروت اور ریحان حسین کو بری کر دیا گیا۔

چھ جولائی 2021 کو سامنے آنے والے اس معاملے میں مقدمے کی کارروائی تقریباً ساڑھے پانچ ماہ تک چلی اور گذشتہ برس 28 ستمبر کو سات ملزمان پر فرد جرم عائد کی گئی تھی۔

کیس کی سماعت کے دوران متاثرہ جوڑے نے عدالت کے سامنے اپنا بیان بھی تبدیل کرتے ہوئے مقدمے کی مزید پیروی سے انکار کر دیا تھا تاہم حکومت نے متاثرہ جوڑے کی طرف سے بیان حلفی جمع کروانے کے بعد اس مقدمے کو لڑنے کا فیصلہ کیا تھا۔

اسلام آباد کی مقامی عدالت نے سیکٹر ای الیون میں لڑکا لڑکی کو جنسی طور پر ہراساں کرنے، ان کی برہنہ ویڈیو بنانے اور انھیں جنسی عمل پر مجبور کرنے کے مقدمے میں مرکزی ملزم عثمان مرزا سمیت پانچ ملزمان کو جرم ثابت ہونے پر عمرقید کی سزا سنائی۔