وزیراعظم کے معاون خصوصی برائے سیاسی ابلاغ ڈاکٹر شہباز گِل کا کہنا ہے کہ عوامی ریلیف نے نااہل اپوزیشن کو بے نقاب کر دیا ہے۔

ڈاکٹر شہباز گِل نے شہباز شریف کے بیان پر ردعمل دیتے ہوئے کہا کہ آئی ایم ایف کا طعنہ دینے والے آج اسی کے وکیل بنے ہوئے ہیں۔

انہوں نے کہا کہ عوامی مفاد کے خلاف ہرزہ سرائی کرنے والی نااہل لیگ کی سیاست دفن ہوچکی ہے، عوام نااہل اپوزیشن کا ہر پینترہ خوب پہنچانتے ہیں۔

شہباز گِل نے مزید کہا کہ بہتر ہوتی معیشت کے اثرات اب عام آدمی تک پہنچ رہے ہیں، عالمی منڈی میں پیٹرول قیمتوں میں اضافہ لیکن پاکستان میں کمی نااہل اپوزیشن سے برداشت نہیں۔

قائد حزب اختلاف شہباز شریف نے اپنے جاری کردہ بیان میں کہا تھا کہ دعا ہے عمران نیازی اپنے پیکج پر یوٹرن نہ لیں، آئی ایم ایف اور عوام کو خوش کرنے کیلئے چکر دیئے جارہے ہیں۔

مسلم لیگ (ن) کے صدر نے کہا کہ ڈوبتی سیاست بچانے کے لئےقومی مفادات کو بلی چڑھایا جارہا ہے، پیٹرول کی قیمت کم ہوئی تو مہنگائی میں کمی کیوں نہیں ہوئی؟

‎ قائد حزب اختلاف نے کہا کہ حکومت ہر ماہ بیرون ملک سے ایک ارب ڈالر قرض لے رہی ہے، کمپنیوں کو ایل سی کھولنے میں ہچکچاہٹ سے تیل بحران پیدا ہوسکتا ہے۔

شہباز شریف نے مزید کہا کہ کےالیکٹرک کا بجلی میں 2روپے 90 پیسے اضافہ ریلیف واپس لینے کے مترادف ہے، بجٹ تک اضافہ نہ کرنے والے بجلی کی قیمت کیوں بڑھا رہے ہیں؟