بھارتی ریاست اُتر پردیش (یو پی) کے نائب وزیرِ اعلیٰ کیشو پرساد موریہ کے بیٹے یوگیش سڑک حادثے کا شکار ہوگئے ہیں۔

یوگیش لکھنو سے فارچونر گاڑی سے پیتامبرا ماتا کے درشن کرنے کے لئے جا رہے تھے کہ ان کی گاڑی ٹریکٹر ٹرالی سے ٹکرا گئی۔

نائب وزیراعلیٰ کے بیٹے اس حادثے میں بال بال بچ گئے ہیں، تاہم انہیں کچھ چوٹیں آئی ہیں۔

مذکورہ حادثہ جھانسی کانپور ہائی وے 27 پر پیش آیا۔ حادثے کی اطلاع کے بعد کالپی کوتوالی پولیس موقع پر پہنچ گئی۔

حادثے کے وقت یوگیش موریہ کے ساتھ تین لوگ اور تھے۔

اطلاعات کے مطابق، گاڑی یوگیش کا ڈرائیور چلا رہا تھا۔ اس درمیان کالپی کے عمل تاش تراہا کے پاس ٹریکٹر ٹرالی نے ان کی کار کو ٹکر مار دی۔

اس حادثے میں فارچونر کار بری طرح سے تباہ ہوگئی، جبکہ ٹریکٹر بھی دو حصوں میں بنٹ گیا۔

جیسے ہی یوگیش موریہ کے حادثہ کی خبر پولیس کو ملی ویسے ہی کالپی سی او رام سنگھ اور ایس او سنتوش سنگھ موقع پر پہنچ گئے۔

اس کے بعد فوراً دوسری کار کا انتظام کر کے سبھی لوگوں کو آگے کے لئے روانہ کردیا گیا۔

پولیس نے بتایا کہ حادثے کا شکار ہونے والی فارچونر کو محفوظ مقام پر کھڑا کرا دیا گیا ہے، جبکہ ٹریکٹر ٹرالی کو قبضے میں لے کر کارروائی کی جارہی ہے۔