کہتے ہیں کہ محبت نہ تو عمر کی محتاج ہے، نہ ہی ذات اور مذہب کی پابند ہے، یہ تو بس ہوجاتی ہے۔

انسان کسی بھی عمر میں محبت ہوسکتی ہے، اب یہ اس کی صوابدید پر ہے کہ وہ اس کا اظہار کرتا ہے یا نہیں۔

ایس ہی کچھ ہوا 90 سال کی عمر میں موریس بینٹن نامی شخص کے ساتھ جنہیں خود سے دو سال بڑی جوآن آریس سے محبت ہوئی تو انہوں نے عمر کے آخری پڑاو پر اس محبت کو رشتے کا نام دیدیا۔

ڈیلی میل کی ایک رپورٹ کے مطابق یہ سن رسیدہ جوڑا شادی سے 37 سال پہلے سے ہی ایک دوسرے کے ساتھ رہ رہا تھا، لیکن انہیں شادی کی ضرورت اس وقت محسوس ہوئی جب ان میں سے ایک کو دل کا دورہ پڑا۔

اس وقت انہیں لگا کہ اب انہیں ایک رشتے میں بندھنے کی ضرورت ہے۔

جوآن آریس دو بچوں کی ماں ہیںؓ اور ان کے چھ پوتے پوتیاں ہیں۔ اتنا ہی نہیں وہ دو بچوں کی پردادی بھی ہیں۔

موریس اور جوآن ایک دوسرے کو کافی پہلے سے جانتے ہیں اور سالوں تک جوآن نے موریس کی شادی کی تجویز کو قبول نہیں کیا تھا۔

اسی دوران انہیں پچھلے سال جب ہارٹ اٹیک آیا تو جوآن کو احساس ہوا کہ ان کے پاس زیادہ وقت نہیں ہے اور انہیں شادی کرلینی چاہئے ۔

موریس بینٹن کو ان کی منظوری کا پتہ چلا تو وہ بھی چونک گئے ۔ انہوں نے ایک چرچ میں جاکر شادی کی اور اب وہ میاں بیوی بن چکے ہیں۔

جوآن آریس اور موریس بینٹن نے اپنی شادی کی تقریب میں نزدیکی لوگوں کو بلایا تھا۔

اس سے پہلے جوآن آریس کی دو شادیاں ہوچکی ہیں۔ ان کی پہلی شادی جہاں طلاق کی وجہ سے ختم ہوئی تھی تو وہیں ان کے دوسرے شوہر کی موت 50 سال کی عمر میں ہوگئی تھی۔

چونکہ وہ گزشتہ 37 سال سے ساتھ رہ رہے تھے ، اس لئے بہت سے رشتہ داروں کو لگتا تھا کہ وہ پہلے سے ہی شادی شدہ ہیں۔

سال 2021 میں بھی ایک ایسی ہی لَو اسٹوری وائرل ہوئی تھی، جس میں آسٹریلیا کے رہنے والے جوڑے 93 سال کی میری ہل اور 100 سال کے رون ہیڈلی نے شادی کی تھی۔