آج آپ کو ہم بیلسٹک اور کروز میزائل میں فرق بتائیں گے۔

جب آپ ریل گاڑی میں سفر کررہےہوں اور کھڑکی کا شیشہ ہٹا کر اپنا بازو باہر نکالیں تو آپ کو اپنے بازو پر ہوا کا شدید دباؤ محسوس ہوگا۔

اس بات سے آپ انداز لگائیں کہ اگر دو سو یا ڈھائی سو کلومیٹر کی رفتار سے چلنے والی گاڑی کو ہوا کے ایسے دباؤ کا سامنا ہوتا ہے تو میزائل کو ہوا کی کیسی شدید رگڑ کا سامنا ہوتا ہوگا؟

کروز میزائل زمینی کرہ ہوائی میں اڑتا ہے اور ہوا کا دباؤ اور رگڑ برداشت کرتا ہوا اپنے ہدف تک پہنچتا ہے یعنی کروز میزائل جہاز کی طرح جیٹ انجنوں کی طرز سے اڑتا ہے جبکہ بیلسٹک میزائل سب سے پہلے راکٹ کی طرح زمینی کرہء ہوائی سے باہر نکلتا ہے اور وہاں سے اپنے ہدف کو نشانہ بناتا ہے یعنی بلیسٹک میزائل راکٹ کی طرح سفر کرتا ہے۔ ۔

ان دونوں طرز کے میزائلوں کے اپنے اپنے مثبت اور منفی پہلو ہیں اور اسی لئے اہداف کے مطابق ان کا استعمال عمل میں آتا ہے۔
کروز میزائل ایک ہدف کے لئے روانہ کیا جاتا ہے اور یہ اپنے ہدف کو ٹھیک ٹھیک نشانہ بنانے میں بلیسٹک میزائلوں سے زیادہ مؤثر سمجھا جاتا ہے۔

اس کے علاوہ یہ ایک گائیڈڈ میزائل ہوتا ہے جو ایک مستقل رفتار سے اپنے ہدف کی جانب بڑھتا ہے اور انتہائی درست انداز سے اپنے ہدف کو نشانہ بنانے کی صلاحیت کا حامل ہوتا ہے۔

یہ سب سونک، سپرسانک اور ہائپرسونک رفتار کا حامل ہو سکتا ہے اور عموماﹰ اس کے لئے پلس جیٹ انجن، ریم جیٹ انجن یا سپریم جیٹ انجن استعمال کیے جاتے ہیں۔

اس ہی لئے کروز میزائل فقط ایک ہتھیار کا حامل ہوتا ہے جو عموماً روایتی یا غیرجوہری ہتھیار کی صورت میں ہوتا ہے۔

کروز میزائل کے مقابلے میں بیلسٹک میزائلوں کو ایک یا ایک سے زائد ہدف کے لئے روانہ کیا جا سکتا ہے اور ان کی بنیادی اقسام میں شارٹ رینج، میڈیم رینج، انٹرمیڈیٹ رینج اور بین البراعظمی رینج شامل ہیں۔

اس کے لئے راکٹ انجن استعمال کیا جاتا ہے جو سب سے پہلے اس میزائل کو زمینی کرہء ہوائی سے باہر نکالتا ہے۔

اس میزائل کو انتہائی اوپر پہنچانے کے بعد دوبارہ زمین کی جانب روانہ کیا جاتا ہے اور زمینی تجاذبی کشش کی وجہ سے یہ انتہائی رفتار حاصل کر لیتا ہے۔

بیلسٹک میزائل زیادہ تر روایتی کے علاوہ غیرروایتی یعنی جوہری ہتھیار بھی لے جا سکتے ہیں اور یہ بیک وقت کئی مقامات کو نشانہ بنانے کے لئے بھی استعمال ہوتے ہیں۔

ویسے بلیسٹک میزائل کروز‍ میزائلوں کی طرح ہدف کو انتہائی ٹھیک ٹھیک نشانہ تو نہیں بنا سکتے مگر اس کے باوجود خاصی درستی سے ہدف تک پہنچ سکتے ہیں۔