جاپانی کمپنی ہونڈا موٹرز نے اعلان کیا ہے کہ اس نے روس کو کاروں اور موٹرسائیکلوں کی برآمدات معطل کر دی ہیں، جس سے اس بات کا اشارہ ملتا ہے کہ مزید جاپانی کار ساز کمپنیاں یوکرین پر حملے کے بعد روس کے ساتھ کاروبار روکنے کی مہم میں عالمی سطح پر بڑھ چڑھ کر حصہ لیں گی۔

مغربی کمپنیوں نے بھی یوکرین پر حملے کے بعد روس میں فروخت روک دی ہے اور یہاں تک کہ وہاں موجود اپنی سرمایہ کاری ختم کرنے کا عندیہ بھی دیا ہے۔

فورڈ موٹرز اور دیگر عالمی کار ساز ادارے پہلے ہی کہہ چکے ہیں کہ وہ روس میں آپریشن معطل کر دیں گے۔

لیکن اب تک بہت سی جاپانی فرمز نے ردعمل میں خاموش اختیار کی ہوئی ہے۔

کمپنی کے ایک ترجمان نے روئٹرز کو بتایا کہ ہونڈا نے بدھ تک روس کو تمام برآمدات معطل کر دی تھیں، تاہم یہ نہیں بتایا گیا کہ یہ معطلی کب سے نافذ ہوئی۔

ترجمان نے کہا کہ گاڑیوں کی ترسیل اور ادائیگیوں میں دشواری معطلی کی وجہ ہے۔ آٹومیکر کے پاس روس میں فیکٹریاں نہیں ہیں۔

انہوں نے بتایا کہ ہونڈا نے روس میں 2020 کے مالی سال میں 1,406 کاریں فروخت کیں۔

جاپانی اخبار کی رپورٹ کے مطابق مزدا موٹر کارپوریشن روس کو آٹو پارٹس کی برآمدات روکنے کا بھی ارادہ رکھتی ہے۔ تاہم، مزدا کے ترجمان نے اس پر تبصرہ کرنے سے انکار کردیا۔

ایک ترجمان نے کہا کہ نسان موٹر کمپنی لمیٹڈ روس میں اپنا کام جاری رکھے ہوئے ہے اور وہاں کی صورتحال پر گہری نظر رکھے ہوئے ہے۔ ترجمان نے کہا کہ یوکرین میں اس کی ڈیلرشپ اور دفاتر بند ہیں۔

ترجمان نے مزید کہا کہ نسان نے 2021 میں روس میں 53,000 گاڑیاں فروخت کیں۔

ایک ترجمان نے کہا کہ روس میں ٹویوٹا موٹر کارپوریشن کا کاروبار معمول کے مطابق جاری تھا، حالانکہ ملک میں ترسیل میں جزوی رکاوٹ تھی۔

متسوبشی موٹر کارپوریشن نے منگل کو کہا کہ وہ روس پر پابندیوں کے نتیجے میں ممکنہ سپلائی چین میں رکاوٹوں کا حوالہ دیتے ہوئے روس میں اپنی کاروں کی پیداوار اور فروخت کو معطل کر سکتا ہے۔

جاپانی وزارت خزانہ کے مطابق، سال 2020 میں روس کو جاپانی برآمدات کا نصف سے زیادہ حصہ آٹوز اور آٹو پارٹس پر مشتمل ہے۔