فرخ حبیب نے کہا ہے کہ عوام کو ریلیف کی فراہمی وزیراعظم کی ترجیح ہے۔

وزیر مملکت اطلاعات فرخ حبیب نے فیصل آباد میں عوامی اجتماع سے خطاب کرتے ہوئے کہا کہ وزیراعظم عمران خان عوام کی بہتری کیلئے کام کر رہے ہیں، عمران خان لندن میں  اپنی جائیدادیں بنانے کی بجائے عوام کو گھر بناکر  دے رہے ہیں۔

انہوں نے کہا کہ اپنے نام کے آگے زرداری کا لفظ لگانے سے کوئی لیڈر نہیں بن جاتا، زرداری کے وارث نے مینار پاکستان کی بجائے ناصر باغ میں جلسی کی۔

وزیر مملکت اطلاعات کا کہنا تھا کہ رمضان شوگر کے ملازمین کے اکاؤنٹس سے اربوں روپے نکل رہے ہیں جبکہ 10 ہزار تنخوا ہ لینے والے مقصود چپڑاسی کے اکاؤنٹس سے 4 ارب روپے برآمد ہوئے، ان کے خلاف انتقامی کارروائی نہیں احتسابی کارروائی ہو رہی ہے۔

فرخ حبیب کا یہ بھی کہنا تھا کہ عوام کو ریلیف کی فراہمی وزیراعظم کی ترجیح ہے، حکومتی پالیسیوں کے باعث عالمی سطح پر پاکستان کا وقار بلند ہوا ہے۔

انہوں نے کہا کہ عالمی سطح پر مہنگائی کے باوجود پاکستان میں پٹرول کی قیمتیں کم ہیں، قیمتوں میں اضافے پر شور مچانے والے اب پٹرول کی قیمت  کم ہونے پر پر واویلا کررہے ہیں۔

فرخ حبیب نے یہ بھی کہا کہ سندھ کے عوام گندا پانی پینے پر مجبور ہیں، ہم چوروں اور ڈاکوؤں کو جیلوں میں ڈالیں گے اور عمران خان آئندہ 5 سال بھی وزیراعظم رہیں گے۔

وزیر مملکت اطلاعات فرخ حبیب کا مزید کہنا تھا کہ عمران خان  کا دل عوام کے ساتھ دھڑکتا ہے، عوام کے ساتھ مل کر پاکستان کو ترقی یافتہ ملک بنائیں گے۔