عدالت نے انکوائری رپورٹ کی بنیاد پر ریسکیو 1122 کو درخواست گزار کی بھرتی کے احکامات جاری کر دیے۔

تفصیلات کے مطابق سابقہ فاٹا اور ایف آرز میں ریسکیو 1122 میں بھرتیوں کے معاملے میں اہلیت کے باوجود حسن خیل کے عامر خان کو بھرتی نہ کرنے کے خلاف پشاور ہائیکورٹ میں کیس کی سماعت ہوئی۔

جسٹس روح الامین کی سربراہی میں پشاور ہائی کورٹ کے دو رکنی بینچ نے کیس کی سماعت کی۔

وکیل درخواست گزار طارق افغان نے عدالت میں مؤقف پیش کیا کہ سابق فاٹا اور ایف آرز میں ریسکیو 1122 نے اکاؤنٹ اسسٹنٹ کی 13 آسامیاں مشتہر کی تھی۔

درخواست گزار کے وکیل نے عدالت کو نتایا کہ ٹیسٹ پاس کرنے اور اہلیت کے باوجود حسن خیل کی سیٹ پر باجوڑ کے رہائشی کو بھرتی کیا گیا۔

عدالت نے معاملے کی تحقیقات کے لیے انکوائری ٹیم مقرر کر دی تھی۔ انکوائری رپورٹ میں ٹیسٹنگ ایجنسی کو قصور وار قرار دیا گیا۔

پشاور ہائیکورٹ میں پیش انکوائری رپورٹ میں بتایا گیا کہ ٹیسٹنگ ایجنسی سے نام اور علاقہ کے اندراج میں غلطی ہوئی تھی۔

عدالت نے انکوائری رپورٹ کی بنیاد پر ریسکیو کو درخواست گزار کی بھرتی کے احکامات جاری کیے۔

پشاور ہائی کورٹ کے احکامات پر عملدرآمد کرتے ہوئے ریسکیو 1122 نے درخواست گزار کا بھرتی نامہ جاری کر دیا۔