امرود اکثر لوگوں کو پسند ہوتا ہے کیونکہ اس کی تاثیر ٹھنڈی ہوتی ہے اور یہ بہت لذیز پھل ہے ،اس کے صحت پر چند حیران کن فائدے ہیں۔

وہ افراد جو معدے کی مختلف بیماریوں کا شکار ہیں، اُنہیں امرود کا استعمال لازمی کرنا چاہئیے۔

امرود ذہنی امراض، بواسیر اور زکام سے چھٹکارا حاصل کرنے میں مددگار ثابت ہوتا ہے۔

امرود کی دو اقسام ہیں ایک سرخی مائل گلابی امرود اور دوسرا سفید امرود لیکن صحت کے لیے سرخی مائل گلابی امرود زیادہ مفید ہوتا ہے۔

جرنل آف ہیومن ہائی ٹینشن میں شائع ہونے والی ایک تحقیق کے مطابق امرود جسم میں کولیسٹرول کو کنٹرول کرتا ہے جس کی وجہ سے دل کی کئی بیماریوں سے بچا جاسکتا ہے۔

امرود میں اینٹی آکسیڈنٹس کی موجودگی کی وجہ سے یہ انسانی جسم میں خلیات کو محفوظ رکھتا ہے جس کی وجہ سے انسان پر جلدی بڑھاپے کے اثرات نمایاں نہیں ہوتے۔

یہ پھل انسانی جسم میں قوتِ مدافعت پیدا کرتا ہے اور ہائی بلڈ پریشر کے مریضوں کے لئے نہایت مفید ثابت ہوتا ہے۔

یہ پھل ذیابیطس کے مریضوں کے لیے بھی بہت مفید ہے کیونکہ یہ جسم میں شوگر کی مقدار کو کم کرتا ہے۔

اس کے علاوہ امرود قبض کے پرانے مریضوں کے لیے تو بہت ہی مفید ہے اور اس کے بیج پیٹ کے اضافی کیڑوں کو بھی مارتے ہیں۔

کھانے سے پہلے امرود کھانا زیادہ بہتر ہے کیونکہ اس سے بھوک لگتی ہے لیکن کھانا کھانے کے بعد امرود کھانے سے قبض ہونے کا خدشہ ہے۔

تھوڑی سی کالی مرچ اور نمک لگا کر امرود کھانا زیادہ فائدے مند رہتا ہے۔

امرود کا مزاج سرد ہے اس لیے ایسے افراد جنہیں موسمِ گرما میں نکسیر پھوٹنے کا عارضہ ہو، ان کے لیے امرود کا استعمال بہت بہترین ہے۔

امرود میں لائیکوپین پایا جاتا ہے جو کہ جسم میں رسولیاں بننے سے روکتا ہے جس سے کینسر کے خدشات کم ہوجاتے ہیں۔