شہباز گِل نے کہا ہے کہ مفاد پرستوں کا منافقانہ گٹھ جوڑ پھر سے ناکام ہوگا۔

 معاون خصوصی برائے سیاسی ابلاغ ڈاکٹر شہباز گِل نے آصف زرداری کے بیان پر ردعمل دیتے ہوئے کہا ہے کہ اپوزیشن کا ایک اور مرتبہ ہزیمت اٹھانے کا وقت ہوا چاہتا ہے۔

انہوں نے کہا کہ زرداری صاحب چہرے جانتے ہیں مگر صرف ٹکٹ بلیک کرنے والوں کے، ملک نے یہ وقت بھی دیکھنا تھا کہ ٹکٹ بلیک کرنے والے ملک پر مسلط رہے۔

شہباز گِل نے کہا ہے کہ ذرداری صاحب کا کردار عوام کے سامنے ہے، چھانگہ مانگہ سیاسی شہرت رکھنے والے پھر سے سرگرم ہیں، کھلے عام خرید و فروخت کرنے والوں کو قوم پہلے بھی ریجیکٹ کر چکی ہے۔

معاون خصوصی برائے سیاسی ابلاغ نے کہا کہ مفاد پرستوں کا منافقانہ گٹھ جوڑ پھر سے ناکام ہوگا۔

واضح رہے کہ سابق صدر آصف زرداری نے لانگ مارچ سے خطاب کرتے ہوئے کہا تھا کہ وقت آگیا ہے آگے بڑھ کرناپاک وزیراعظم کو نکالیں، ان کی جگہ کسی شریف آدمی کو لائیں، میں چہرے جانتا اور پہچانتا ہوں۔

انہوں نے کہا تھا کہ دشمنوں اور پیارکرنے والے دوستوں کوبھی جانتا ہوں، بلاول بھٹوکے ساتھ ملکرعوام کی خدمت کریں گے، مہنگائی کم کرکےعوام کی تکلیف دورکریں گے۔

دوسری جانب چیئر مین پیپلز پارٹی بلاول بھٹو نے لانگ مارچ سے خطاب کرتے ہوئے کہا تھا کہ جیالوں کا لشکرڈی چوک پہنچے گا توعوام کوخوشخبری دیں گے۔

انہوں نے کہا تھا کہ ہم مکمل پلاننگ سے میدان میں نکلے ہیں، ہرصورت عدم اعتماد کو کامیاب کرائیں گے، ہارنے کا سوال ہی پیدا نہیں ہوتا۔