خیبرپختونخوا فوڈ سیفٹی اتھارٹی نے بنوں سمیت صوبے کے مختلف علاقوں میں کاروائیاں کی ہیں۔

تفصیلات کے مطابق خیبرپختونخوا فوڈ سیفٹی اتھارٹی نے بنوں کے علاقے لکی گیٹ میں خفیہ اطلاع پر گودام پر چھاپا مار کر غیر معیاری اسمگل شدہ خوردنی تیل برآمد کر لیا۔

فوڈ سیفٹی اتھارٹی حکام نے بتایا کہ گودام سے ایک ہزار لیٹر سے زیادہ غیر معیاری، مس لیبل و زائد المعیاد خوردنی تیل برآمد کر کے گودام کو سیل کردیا گیا ہے۔

 فوڈ سیفٹی اتھارٹی کا کہنا ہے کہ اپر دیر کے علاقے سلیم مارکیٹ میں بھی گودام سے 1200 لیٹر سے زائد غیر معیاری خوردنی تیل برآمد کر کے گودام کو سیل کردیا گیا ہے۔

اس کے علاوہ حویلیاں بازار میں بھی انسپکشن کے دوران 200 لیٹر سے زائد غیر معیاری خوردنی تیل برآمد کیا گیا ہے۔

فوڈ سیفٹی اتھارٹی کا کہنا ہے کہ غیر معیاری خوردنی تیل اور گھی کے خلاف کارروائیوں کا سلسلہ جاری رہے گا۔

خیال رہے کہ کچھ روز قبل ہی خیبرپختونخوا فوڈ سیفٹی اتھارٹی کی جانب سے جعلی گڑ تیار کرنے والے یونٹ کے خلاف کی گئی کارروائی کے نتیجے  میں 1400 کلو چینی، خراب گڑ اور مضر رنگ  ضبط کرلیا گیا تھا۔

ڈی جی فوڈ سیفٹی اتھارٹی شاہ رخ علی خان کا کہنا ہے کہ یونٹ میں گنے کے بجائے چینی، خراب گڑ اور مضر صحت رنگوں کی مدد سے گڑ تیار کیا جارہا تھا۔

ڈی جی فوڈ سیفٹی اتھارٹی کے مطابق مارکیٹ میں صاف اور محفوظ خوراک کی فراہمی یقینی بنا رہے ہیں، عوام بھی ملاوٹ مافیا کے خلاف شکایات ہمارے ٹال فری نمبر پر درج کرائیں۔