بھارتی میڈیا کا کہنا ہے کہ صحافی کے ساتھ بدسلوکی پر سلمان خان کو عدالت نے طلب کر لیا ہے۔

بھارتی میڈیا رپورٹ کے مطابق صحافی کے ساتھ بدسلوکی کرنے پر بالی ووڈ کے سلومیاں کو عدالتی ثمن جاری ہوئے ہیں، جس کے بعد سلمان خان کو ایک مرتبہ پھر قانونی کاروائیوں کا سامنا کرنا پڑ رہا ہے۔

بھارتی میڈیا کا کہنا ہے کہ سلمان خان نے ایک صحافی اشوک پانڈے کے ساتھ مبینہ طور پر بدتمیزی کی، جس کی وجہ سے ممبئی کی اندھیری مجسٹریٹ کورٹ نے اداکار کو ثمن جاری کیا ہے۔

مجسٹریٹ کورٹ کی جانب سے جاری کیے گئے ثمن کے مطابق سلمان خان کو صحافی کی جانب سے 2019 میں دائر کیے گئے مقدمے میں 5 اپریل کو عدالت طلب کیا گیا ہے۔

بھارتی میڈیا رپورٹ کے مطابق سلمان خان پر انڈین پینل کوڈ کے سیکشن 504 اور 506 کے تحت مقدمہ درج کیا گیا ہے۔

یہی نہیں بلکہ عدالت نے سلو میاں پر ایک پُرانا کھاتہ بھی کھول رکھا ہے راجستھان ہائی کورٹ نے پیر کو سلمان خان کے خلاف کالے ہرن کے شکار کے مقدمے کی دو درخواستوں کو جودھ پور ڈسٹرکٹ اینڈ سیشن کورٹ سے ہائی کورٹ منتقل کرنے کی اجازت دے دی ہے جس میں اداکار کے خلاف ایک سماعت پہلے ہی زیر التوا ہے۔

بھارتی میڈیا کے مطابق سلمان خان نے ہائی کورٹ میں ایک عرضی دائر کی تھی جس میں ان دونوں درخواستوں کو ہائی کورٹ منتقل کرنے کا مطالبہ کیا گیا تھا تاکہ تینوں مقدمات کی سماعت ایک جگہ پر ہو۔

خیال رہے کہ سلو میاں کو 1998 میں کالے ہرن کے شکار کے کیس سمیت ایک ساتھ کئی مقدمات کا سامنا کرنا پڑ رہا ہے۔