بلوچستان میں اینٹی نارکوٹکس فورس (اے این ایف) اور این ایف ڈی آئی خان نے کارروائی کرتے ہوئے بھاری مقدار میں منشیات برآمد کرلی ہیں۔

تفصیلات کے مطابق کارروائی ژوب میں ڈی آئی خان روڈ پر درا بن کے مقام پر کی گئی ، جہاں ٹرک سے بھاری مقدار میں منشیات برآمد کرلی گئی ہے۔

ترجمان اے این ایف ہیڈ کوارٹرز راولپنڈی کا کہنا ہے کہ 490 کلوگرام سے زائد منشیات ٹرک کے فیول ٹینک میں خفیہ طور پر چھپائی گئی تھی۔

ترجمان اے این ایف نے بتایا کہ برآمدشدہ منشیات میں 447.6 کلوگرام چرس، 38.4 کلوگرام افیون اور 4.250 کلوگرام آئس شامل ہے۔

ترجمان اے این ایف نے بتایا کہ دورانِ کارروائی پشین کے رہائشی حفیظ اللّٰہ اور جہانگیر نامی دو ملزمان بھی گرفتار کرلیے گئے ہیں۔

ترجمان اے این ایف کا کہنا تھا کہ دونوں ملزمان کے خلاف انسداد منشیات ایکٹ کے تحت مقدمات درج کر کے مزید تفتیش کا آغاز کردیا گیا ہے۔

واضح رہے کہ کچھ دن قبل بھی   اینٹی نارکوٹکس فورس (اے این ایف) اور اے این ایف کراچی نے شہر قائد میں مشترکہ کارروائی کرتے ہوئے بھاری مقدار میں منشیات برآمد کی تھی۔

 کارروائی الآصف اسکوئر کے قریب کی گئی تھی جہاں تین ملزمان کے قبضے سے 3.030 کلوگرام منشیات برآمد کی گئی تھی۔

ترجمان اے این ایف کے مطابق ملزمان کو منشیات کی خرید و فروخت کے دوران رنگے ہاتھوں گرفتار کیا گیا، گرفتار ملزمان میں چاغی کے رہائشی راشد اور فضل الرحمن جبکہ سانگھڑ کا رہائشی محمد رفیق شامل ہیں۔