انڈین انسٹی ٹیوٹ آف ٹیکنالوجی کانپور کے محققین نے خدشہ ظاہر کیا ہے کہ بھارت میں کورونا کی چوتھی لہر آنے کا امکان ہے۔

غیر ملکی خبر رساں ادارے کے مطابق انڈین انسٹی ٹیوٹ آف ٹیکنالوجی کانپور کے محققین کی تحقیق کی دوران  یہ بات سامنے آئی ہے کہ بھارت میں رواں سال 22 جون سے عالمی وباء کورونا کی چوتھی لہر آسکتی ہے اور اگست میں اس کی شدت میں بتدریج اضافہ ہوگا۔

تحقیق میں ماہرین کا مؤقف ہے کہ پورے ملک میں کورونا وائرس کی شدت اس پر منحصر ہے کہ نئی اقسام کے ابھرنے اور لوگوں میں اس سے بچاؤ کے لیے ویکسینیشن کا رجحان کس نوعیت کا ہوگا ۔

مذکورہ بالا تحقیق کے مطابق چوتھی لہر کا آغاز رواں سال 22 جون سے ہوگا، 23 اگست کو یہ لہر اپنے عروج پر پہنچے گی، اور 24 اکتوبر کو ختم ہوجائے گی۔

تاہم، محققین کا کہنا ہے کہ کورونا وائرس کی ممکنہ نئی اقسام اس پوری صورتحال پر زیادہ اثر انداز ہوسکتی ہیں۔

اس کے علاوہ، ویکسین کی پہلی، دوسری یا بوسٹر ڈوز بھی اس انفیکشن کے  کے اثرات کو کم کرنے اور چوتھی لہر سے متعلق مختلف مسائل میں اہم کردار ادا کر سکتی ہے۔

دوسری جانب اس حوالے سے ورلڈ ہیلتھ آرگنائزیشن کے سربراہان نے حال ہی میں متنبہ کیا تھا کہ اومیکرون کورونا وائرس کی آخری قسم نہیں بلکہ اس کی کئی اور اقسام بھی جنم لے سکتی ہیں۔