ڈاکٹر یاسمین راشد کا کہنا ہے کہ عمران خان کے نام پر ووٹ لیکر لوٹے بننے والوں کو کچھ نہیں ملے گا۔

صوبائی وزیر صحت ڈاکٹر یاسمین راشد نے سرگودھا میں میڈیا سے گفتگو کرتے ہوئے کہا کہ عوام کا جلسہ میں جوش و ولولہ دیکھا تو یقین ہوا کہ قوم زندہ ہے۔

انہوں نے کہا کہ کسی کے محکوم نہیں رہ سکتے، یہ ملک آزاد ہے اس پر سودے بازی نہیں ہو گی، چند سکوں کی خاطر عزت بیچنے والوں پر افسوس ہے، دھرتی کا سودا کرنے والوں کو حکومت نہیں دینگے۔

صوبائی وزیر کا کہنا ہے کہ عمران خان کے جلسے میں 6 لاکھ سے زائد لوگ پنجاب سے گئے تھے، جن کی نظر کمزور انکو 10 ہزار نظر آرہے تھے، انہوں نے بچپن سے جھوٹ بولتے دیکھا اسی لیے ڈھٹائی کے ساتھ پھر جھوٹ بول دیا۔

یاسمین راشد نے کہا کہ محب وطن عوام جانتے ہیں عمران خان ہی ملک کی عزت و بقاء کی بات کرتے ہیں، آج ہم طاقتور ملکوں کی آنکھوں میں آنکھیں ڈال کر بات کر سکتے ہیں۔

انہوں نے کہا کہ اسلاموفوبیا کی بات آج تک کسی نے نہیں کی، عمران خان نے دنیا کو اسلام اور حضورِ اکرم صلی اللہ علیہ وسلم سے محبت سے آگاہ کیا، یہ ہمیشہ سے ڈرون حملوں کے خلاف تھے جن کو حکومت میں آتے ہی روک دیا۔

صوبائی وزیر کا کہنا ہے کہ عمران خان کو باہر نکالنے والے دوبارہ لوٹمار کیلئے آنا چاہتے ہیں، ڈیزل بیچ کر کمائی کرنے والے کمشنوں کے لیے حکومت میں آنا چاہتے ہیں۔

وزیر صحت پنجاب نے کہا کہ پاکستان کو لوٹ کے کھانے والے عمران خان پر تنقید کرتے ہیں، عمران خان کا کوئی سپاہی کرپشن میں ملوث نہیں، عوام کی خدمت کیلئے اقتدار میں آئے ہیں۔

یاسمین راشد نے کہا کہ مریم نواز اپنے آپ کو حکمران خاندان کہتے ہیں، پاکستان کی عزت کو بیچنے والے دوسری طرف کھڑے ہیں، ان کے لیے پیسہ ہی سب کچھ ہے۔

انکا کہنا ہے کہ اینا مینا کی جوڑی بھی ہمارا کچھ نہیں بگاڑ سکے گی، مریم اور بلاول کو ساتھ دیکھا تو افسوس ہوا، پی پی پی کا حصہ رہی، اپنی نانی اور ماں کی توہین کرنے والوں کے ساتھ بلاول کو دیکھ کر افسوس ہوا۔

انہوں نے کہا کہ بلاول بے نظیر کا بیٹا نہیں زرداری کا بیٹا لگ رہا ہے، بلاول کو بھٹو کانام اپنے نام سے ہٹا دے، زرداری کو موقع ملا تو بلاول کا بھی سودا ہو جائے گا، حکومتیں آنی جانی چیزیں ہیں اپوزیشن میں بھی رہے تو عزت کے ساتھ کھڑے ہونگے۔

یاسمین راشد نے مزید کہا کہ ملک کی عزت پر سودا کر کے حکومت میں رہنا قبول نہیں، عمران خان کے نام پر ووٹ لیکر لوٹے بننے والوں کو کچھ نہیں ملے گا، اللہ جس کے ساتھ ہے اس کا کوئی کچھ نہیں بگاڑ سکتا۔