پاکستان کرکٹ بورڈ(پی سی بی) کے سابق چیف ایگزیکٹو وسیم خان نے کہا کہ انگلینڈ اور نیوزی لینڈ کے پاکستان کا دورہ نہ کرنے کی کوئی وجہ باقی نہیں رہی۔

تفصیلات کے مطابق سابق چیف ایگزیکٹیو وسیم خان نے کہا ہے کہ آسٹریلیا کا دورہ پاکستان دنیا بھر میں پاکستانی کرکٹ شائقین کے لیے بہت بڑا موقع ہے۔

وسیم نے انکشاف کیا کہ کرکٹ آسٹریلیا کے سی ای او نک ہاکلے نے پہلے ٹیسٹ کے آغاز سے قبل انہیں ایک ذاتی پیغام بھیجا جس میں ان کی شمولیت اور اس دورے کو ترتیب دینے میں ابتدائی طور پر کوششوں کا شکریہ ادا کیا۔

انہوں نے کہا کہ میں کرکٹ آسٹریلیا کی انتظامیہ اور عثمان خواجہ جیسے کھلاڑیوں سے بھی مسلسل رابطے میں ہوں۔

وسیم خان نے اس دورے کی اہمیت پر زور دیتے ہوئے کہا کہ یہ بدقسمتی کی بات ہے کہ نیوزی لینڈ اور انگلینڈ نے گزشتہ سال پاکستان کے دورے سے کس طرح دستبرداری اختیار کی، اب ان دونوں ممالک کے پاس اس سال کے آخر میں پاکستان کا دورہ نہ کرنے کی کوئی وجہ نہیں ہے۔

ان کا کہنا تھا کہ یہ بہت اچھا لگتا ہے کہ پاکستان سے ایسی مثبت خبریں آ رہی ہیں، آسٹریلوی کھلاڑیوں  کے بیانات بہت حوصلہ افزا ہیں، جو پاکستان کے لیے ایک حقیقی فخر کا لمحہ ہے۔