ضلعی انتظامیہ لاہور رمضان المبارک میں انتظامات کو حتمی شکل دینے میں مصروف ہیں۔

ڈی سی لاہور عمر شیر چٹھہ کی زیر صدارت رمضان المبارک کے شروع ہونے سے قبل رمضان بازاروں میں انتظامات کے حوالے سے اہم اجلاس منعقد ہوا۔

اجلاس میں ڈی سی لاہور عمر شیر چٹھہ نے بریفنگ دیتے ہوئے کہا کہ 32 رمضان بازار لگائے جائیں گے، تحصیل سٹی میں 09، رائیونڈ 04، شالیمار 04، ماڈل ٹاؤن 09 اور کینٹ میں 06 رمضان بازار لگائے جائیں گے۔

عمر شیر چٹھہ نے بتایا کہ 10 ماڈل بازار اور رمضان بازار، 03 اتوار بازار اور رمضان بازار کے علاوہ 19 رمضان بازار ہوں گے۔

ڈی سی لاہور نے آٹا اور چینی کے اسٹالز کو رمضان بازاروں میں موزوں جگہ پر لگانے کی ہدایت دی اور کہا کہ چینی اور آٹا کے اسٹالز رمضان بازاروں کے گیٹس پر نہ لگے ہوں بلکہ اندر کر کے لگے ہوں۔

انہوں نے کہا کہ اسسٹنٹ کمشنرز اپنی اپنی تحصیلوں میں بازاروں کے دورے کریں اور بازاروں میں اپ گریڈیشن کے حوالے سے تمام تر معاملات کو دیکھیں۔

ڈی سی لاہور کا کہنا ہے کہ کل تک ایڈیشنل ڈپٹی کمشنر ریونیو توقیر الیاس چیمہ کو بازاروں میں اپ گریڈیشن کے حوالے سے اپ ڈیٹ دی جائے اور ہر رمضان بازار میں ایک انچارج تعینات کیا جائے گا۔

عمر شیر چٹھہ نے کہا کہ 27 مارچ تک رمضان بازار مکمل طور پر فنکشنل ہونے چاہئے، اور ان بازاروں میں تمام تر انتظامات مکمل ہونے چاہیے۔

انہوں نے مزید کہا کہ عوام الناس کے بیٹھنے کے انتظامات کو مدنظر رکھا جائے، فیئر پرائس شاپس کی بذریعہ سی سی ٹی وی کیمروں کے مانیٹرنگ کی جائے گی۔

واضح رہے کہ اجلاس میں ایڈیشنل ڈپٹی کمشنرز، اسسٹنٹ کمشنرز، سی سی او ایم سی ایل اور دیگر محکموں کے افسران نے شرکت کی۔