چین میں پاکستان کے سفیر معین الحق کا کہنا ہے کہ پاکستان اور چین یوکرین کے معاملے پر بہت قریبی رابطے میں ہیں اور اس معاملے پر مشترکہ مؤقف رکھتے ہیں تنازعہ کو کم کرنے اور متعلقہ فریقین کے درمیان بات چیت کی اہمیت پر زور دیتے ہیں۔

غیر ملکی خبر رساں ادارے کے مطابق پاکستانی سفیر معین الحق نے جمعرات کو مقامی چینی اخبار دیئے گئے ایک انٹرویو میں یوکرین بحران کے حوالے سے کہا کہ کشیدگی کو کم کرنے اور متعلقہ فریقین کے درمیان بات چیت پر زور دیتے ہیں۔چینی وزیر خارجہ وانگ یی کی اسلامی تعاون تنظیم اجلاس میں خصوصی شرکت اس بات کی عکاسی ہے کہ چین اور پاکستان کے درمیان دوستی لوہے کی طرح مضبوط ہےاور دونوں ممالک کے درمیان نہ صرف مضبوط تعلقات قائم ہیں بلکہ بین الاقوامی مسائل پر قریبی رابطے بھی ہیں۔

ان کا مزید کہنا تھا کہ دونوں ممالک یوکرین بحران پر بہت قریبی رابطے میں ہیں اور اس معاملے پر مشترکہ مؤقف رکھتے ہیں۔ دونوں ممالک کو تشویش ہےاور ہم نے اس تنازعہ کو کم اور ختم کرنے کا مطالبہ کیا ہے۔ اس مسئلے کے حل کرنے کے لیے یوکرین اور روس کے درمیان بات چیت پر زور دیا ہے اور متعلقہ فریقین بات چیت کے ذریعے اس مسئلے کا حل نکالیں۔

روس یوکرین کے مابین جاری جنگ کے تناطر میں ان کا کہنا تھا کہ یہ وقت عقل مند اور سمجھدار سفارت کاری کا ہے۔ اس مسئلے کے حل کے لیے سفارت کاری کو کام کرنے دیں۔ہمیں ایک دوسرے پر انگلی نہیں اٹھانی چاہیے۔ یہ یکجہتی اور اجتماعی کام کا وقت ہے۔ پاکستان اور چین اقوام متحدہ کے فورم پر بھی قریبی رابطہ کاری کر رہے ہیں اور اقوام متحدہ کے اصولوں ، تمام اقوام کے لیےخودمختاری اور علاقائی سالمیت کے احترام پر زور دیتے ہیں۔

پاکستانی سفیر نے کہا کہ پاکستان اور چین کے درمیان انتہائی منفرد اور مضبوط دوطرفہ تعلقات قائم ہیں اور دونوں ممالک خطے کے امن، ترقی اور خوشحالی کے لیے کوشاں ہیں۔