پنجاب پولیس کی جانب سے  پتنگ بازوں کے خلاف آپریشن کیا گیا ہے۔

تفصیلات کے مطابق صوبہ پنجاب کےشہر سرگودھا میں پولیس نے کارروائی کرتے ہوئے 8 افراد کو گرفتار کرکے  ہزاروں کی تعداد میں پتنگیں اور دھاتی ڈوریں برآمد کرلی ہیں۔

ڈی پی او ڈاکٹر رضوان کا کہنا ہے کہ   28 سالہ محمد عباس گلے پر ڈور پھرنے کے باعث جان کی بازی ہار گیا تھا، وقوعہ کی تصدیق کر کے ذمے داران کیخلاف کارروائی کا حکم دے دیا گیا۔

 ڈی پی او نے بتایا کہ تھوڑی سی تفریح کے لئے کسی کا گھر اجاڑ دینا انسانیت کیخلاف ہے تاہم ملزمان کو ان کے کیفرِ کردار تک پہنچایا جائے گا۔

انہوں نے مزید کہا کہ 13 ہزار کے قریب پتنگیں اور  385 کیمیکل ڈوریں برآمد کی گئی ہیں۔

واضح رہے کہ پتنگ بازی ایک انتہائی خطرناک کھیل ہے جس کی وجہ سے ہر سال کئی افراد جان سے ہاتھ دھو بیٹھتے ہیں، یہ صرف وہی لوگ نہیں ہوتے جو پتنگ بازی کا شوق پورا کرتے ہوئے جان کی بازی ہارتے ہیں۔

ہلاک ہونے والوں میں سے اکثر ایسے افراد ہوتے ہیں جنہیں پتنگ بازی کا کوئی شوق نہیں ہوتا نہ ہی وہ اس قاتل کھیل کا طریقہ جانتے ہیں بلکہ وہ ویسے ہی کسی آوارہ ڈور کی زد میں آ کر بے دردی سے جان دے دیتے ہیں یعنی پتنگ بازی ایک ایسا کھیل ہے جس میں کھلاڑی اپنا نقصان کم جبکہ دوسروں کا زیادہ نقصان کر دیتے ہیں۔

یہ نقصان ایسے ہوتے ہیں جن کا کبھی ازالہ نہیں ہو سکتا، پتنگ بازی کے نتیجے میں مالی نقصان شاید ہی کہیں ہوتا ہے اس میں اکثر و بیشتر جانی نقصان ہی ہوتا ہے۔