قومی کرکٹ ٹیم کے فاسٹ بولر حارث رؤف نے کہا ہے کہ ڈیتھ بولنگ پر شان ٹیٹ کے ساتھ کام کر رہا ہوں،ون ڈے سیریز میں میں اپنی بہترین کارکردگی کا مظاہرہ کریں گے۔

تفصیلات کے مطابق حارث رؤف کوویڈ 19 کی وجہ سے ٹیسٹ سیریز سے باہر ہو گئے تھے، تیز گیند باز آسٹریلیا کے خلاف تاریخی سیریز میں اپنا ٹیسٹ ڈیبیو کرنے کے لیے بہت بے چین تھے تاہم  اب وہ محدود اوورز کی سیریز پر توجہ مرکوز کر رہے ہیں جو 29 مارچ سے شروع ہونے والی ہے۔

رؤف آئندہ سیریز میں اپنی بہترین کارکردگی کا مظاہرہ کرنے کے لیے بے تاب ہیں اور کہتے ہیں کہ پاکستانی ٹیم میدان میں شاندار پرفارمنس سے شائقین کو خوش کر دے گی۔

حارث رؤف نے پریس کانفرنس میں کہا کہ دیکھو آسٹریلوی اسکواڈ میں بہت سے کھلاڑی ہیں جو بگ بیش اور شیفلڈ شیلڈ کھیلتے ہیں اور انہوں نے وہاں پرفارم کیا ہے، کم تجربہ ہونے کے باوجود وہ مقابلہ کریں گے اور پاکستان اپنے باؤلنگ اٹیک کو کم نہیں سمجھے گا۔

ان کا کہنا تھا کہ آسٹریلیا 25 سال بعد یہاں آیا ہے اور ہم نے ایک دل لگی ٹیسٹ سیریز دیکھی اور لوگوں نے بڑی تعداد میں حمایت کی۔

حارث رؤف نے مزید کہا کہ ٹیسٹ اور ون ڈے کرکٹ بہت مختلف ہیں، پاکستان میں وکٹیں سست ہیں اور ہمیں کنڈیشنز سے ہم آہنگ ہونا پڑتا ہے،جہاں تک ون ڈے کے لیے ہماری تیاری کا تعلق ہے، ہمارا آج پہلا ٹریننگ سیشن  تھا میں آخری وقت تک اپنی پریکٹس کر رہا ہوں ہمارا مقصد اپنی بہترین کارکردگی پیش کرنا ہوگا۔