بالی وُڈ کے کنگ شاہ رُخ خان نے اپنے ماضی کے ایک انٹرویو میں بتایا ہے کہ انہوں نے زندگی میں پہلی مرتبہ دعا کب مانگی تھی۔

بھارتی میڈیا رپورٹ کے مطابق بالی وڈ کے سپر اسٹار شاہ رخ خان نے معروف میزبان سیمی گریوال کو ماضی میں دیے گئے انٹرویو میں اپنی والدہ کے انتقال کی کہانی سنائی جس میں انہوں نے بتایا کہ انہوں نے زندگی میں پہلی دعا تب مانگی جب ان کی ماں آئی سی یو میں تھیں۔

کنگ خان متعدد بار اپنے کئی انٹرویوز میں اس بات کا اعتراف کرچکے ہیں کہ وہ کبھی کبھار اپنی والدہ کو یاد کر کے بہت زیادہ دکھی ہوجاتے ہیں کہ ان کا کہنا ہے کہ آج وہ جس مقام پر موجود ہیں، ان کی والدہ کو یہ دیکھنا چاہیے تھا۔

ماضی میں مشکل مالی حالات کا سامنا کرنے والے شاہ رخ نے اپنے انٹرویو میں بتایا کہ 1990 میں جب ماں کا انتقال ہوا تو اس وقت میں گوا میں شوٹنگ میں مصروف تھا، مجھے ان کی طبیعت خرابی کی اطلاع ملی تو میں فوراً ممبئی پہنچا۔

شاہ رُخ نے اپنی ماں کی بیماری کے بارے میں بات کرتے ہوئے بتایا کہ والدہ کو کینسر کے ساتھ ذیابطیس کی مریضہ بھی تھیں، ان کے پاؤں بہت زیادہ سوجھ گئے تھے اور ان کی طبیعت بھی ٹھیک نہیں تھی، ماں اس وقت آئی سی یو میں داخل تھیں لیکن مجھے یہ اندازہ نہیں تھا کہ وہ ہمیں چھوڑ جائیں گی۔

شاہ رخ خان کا کہنا تھا کہ دس سال قبل میرے والد کے ساتھ بھی یہ ہی ہوا تھا، میں نے اسپتال میں انہیں اپنی نظروں کے سامنے کھو دیا تھا۔

کنگ خان نے انکشاف کیا کہ وہ مسلمان تو ہیں مگر انہوں نے زندگی میں کبھی دعا نہیں مانگی تھی تاہم جب ان کی والدہ کی آئی سی یو میں تھیں تو ان کی حالت بگڑنا شروع ہوئی، انہیں سانس لینے میں مسئلہ ہوا تو شاہ رُخ بھاگ کر پارکنگ میں آئے اور گھٹنوں کے بل بیٹھ کر دعا مانگنا شروع کردی کہ ان کی والدہ کو درد نہ ہو۔

شاہ رُخ نے مزید بتایا کہ میں واپس آئی سی یو میں آیا تو ڈاکٹر نے بتایا کہ وہ جارہی ہیں، میں نے انہیں دیکھا تو وہ میری آنکھوں میں دیکھ رہی تھیں، پھر آہستہ آہستہ ان کے جسم سے جان نکل گئی۔