بھارتی ریاست مغربی بنگال کی اسمبلی میں حکمران جماعت اور اپوزیشن کے ارکان کے بیچ مار پیٹ کے باعث ایک ایم ایل اے زخمی ہو گیا۔

جہاں ایک طرف پاکستان میں سیاسی پارہ ہائی ہے، وہیں بھارت میں بھی ہنگامہ مچا ہوا ہے۔

بھارت کی مغربی بنگال اسمبلی میں پیر کو جم کر ہنگامہ ہوا۔ بجٹ سیشن کے آخری دن بھاتیہ جنتا پارٹی (بی جے پی) کے رکن اسمبلی نے “بیر بھوم تشدد” پر بحث کے مطالبے پر ممتا بینرجی کی حکومت کے خلاف نعرے بازی کی، جس کے بعد ترنمول اور بی جے پی کے اراکینِ اسمبلی میں ہاتھا پائی کی صورتحال پیدا ہوگئی۔

بھارتی ذرائع ابلاغ کے مطابق ایوان میں کارروائی کے دوران بی جے پی رکن اسمبلی منوج ٹگا اور ترنمول رکن اسمبلی است مجمدار کے درمیان ہاتھا پائی ہوئی، جس میں است مجمدار شدید زخمی ہوئے اور انہیں ہسپتال منتقل کیا گیا۔

ہنگامہ آرائی کے الزام میں اپوزیشن لیڈر سوبھیندو ادھیکاری سمیت پانچ بی جے پی اراکینِ اسمبلی کو کارروائی سے معطل کردیا گیا ہے۔

معطل ہونے والے بی جے پی اراکینِ اسمبلی میں سوبھیندو ادھیکاری کے علاوہ منوج ٹگا ، دیپک برمن ، نرہری مہتو اور شنکر گھوش شامل ہیں۔

حکمراں پارٹی کے چیف وہپ نرمل گھوش نے اسمبلی میں بی جے پی اراکینِ اسمبلی کے خلاف تجویز پیش کرتے ہوئے کہا کہ ایوان کے وقار کو مجروح کیا گیا ہے۔ سوبھیندو ادھیکاری کے اکسانے پر اسمبلی میں ہنگامہ کیا جارہا ہے۔

بی جے پی آئی ٹی سیل کے چیف امت مالویہ نے ایک ویڈیو ٹویٹ کرتے ہوئے لکھا کہ “مغربی اسمبلی میں بھگڈر، بنگال کے گورنر کے بعد ٹی ایم سی اراکینِ اسمبلی نے اب چیف وہپ منوج ٹگا سمیت بی جے پی اراکینِ اسمبلی پر حملہ کیا، کیونکہ وہ ایوان میں رامپور ہاٹ قتل عام پر گفتگو کا مطالبہ کررہے تھے۔ ممتا بینرجی کیا چھپانا چاہتی ہیں؟”

Absolute pandemonium in the West Bengal Assembly. After Bengal Governor, TMC MLAs now assault BJP MLAs, including Chief Whip Manoj Tigga, as they were demanding a discussion on the Rampurhat massacre on the floor of the house.

What is Mamata Banerjee trying to hide? pic.twitter.com/umyJhp0jnE

Advertisement

— Amit Malviya (@amitmalviya) March 28, 2022

ممتا بینرجی حکومت کی وزیر چندریما بھٹاچاریہ نے مطالبہ کیا کہ بی جے پی اراکینِ اسمبلی کو معطل کیا جائے۔

اسمبلی اسپیکر بمان بنرجی نے کہا کہ ایوان کے وقار کو ٹھیس پہنچی ہے۔ املاک کو جو نقصان پہنچا ہے ، اس کا حساب کیا جائے گا۔

اس کے بعد سوبھیندو ادھیکاری سمیت چار دیگر بی جے پی اراکینِ اسمبلی کو اسمبلی کی کارروائی سے معطل کردیا گیا۔